Read NQAARIIT NE ROOG A sutax ale 6 Bible Online

A sutax ale 6 - NQAARIIT NE ROOG bible

A sutax ale 6

¹O Yaal oxe a doona a Moyiis ee: «Ndiiki koy, xan o ga ke um fi’kaa a Firawon fee. Xan o ɓay o mayu katil a riñin bo ta xaƴ Ii-isra’el we da ndet. Kaam ee xan o ɓay o mayu katil a riñin bo ta rax a den saax um.»

²Roog a layahina a Moyiis ee: «Mi refu o YAAL OXE.

³Feeñooxaam a Abraham fa Isaak fa Yakoob nen a ‹ROOG O CEGU-KATIL OXE›, ndaa koy, andnooriim a den ke gon es le refna ‹O YAAL OXE› a tekitna.

⁴Dalnaam ngiɓoor fa den, ndax um coox a den saax le Kanaan, saax le da ngenoogna, a ndef teen xa kataakoon.

⁵Nanaam xa iin axe no Ii-isra’el we, Miimisira we a ndamna mbaƭ, too wetandooxaam ngiɓoor ne mi fa den.

⁶Ten taxu, layi Ii-isra’el we yee: ‹Mi refu o Yaal oxe, too xam sut a nuun no calel ƭomu ke Miimisira we a ndoxondna a nuun. Xam wat a nuun no mbaƭ ne den, muclit a nuun o ɓay ole mi letnuuma soo xaw a den a qaw a ƭomu.

⁷Xam jang a nuun, nu ndef xeet es, um ref Roog nuun, too yaaga xan nu and ee mi refu o Yaal oxe Roog nuun, sutna a nuun no calel ƭomu ke Miimisira we a ndoxondna a nuun.

⁸Xam rokin a nuun no saax le regtuuma, daaɓooxuuma o coox a Abraham fa Isaak fa Yakoob. Xam ci’in a nuun, nu njegkin. Mi yoo, mi o Yaal oxe.»

⁹Moyiis a laya Ii-isra’el we kaaga, ndaa ne da ñagadiloogeena soo a toroxandeel, a tax’a boo mbaagee o nan-giloox a Moyiis.

¹⁰O Yaal oxe a laya a Moyiis ee:

¹¹«Reti, lay a Firawon fee refna o maad Misira, ta xaƴ Ii-isra’el we da sutoox saax um.»

¹²Moyiis a reeƭa mbaambir no Yaal oxe too a doonaan ee: «Ɗeeti, Ii-isra’el we nan-gilooxiraam, yaaga koy, nam Firawon fee a nan-gilooritkaxam, mi fee xooleerna fa lay.»

¹³Maaga, o Yaal oxe a hebla a Moyiis fa Aaroon, da soƥik Ii-isra’el we fa Firawon fee refna o maad Misira, ndax Ii-isra’el we a sutoox saax le Misira.

¹⁴Weeke ndefu yaal a carind ake na xeet fee Isra’el: Xa ƥiy axe Ruben fee refna taaw fee Isra’el: Henok, Palu, Hesron fa Karmi. Weene ndefu a qaw ake mbaqaqoorna na Ruben.

¹⁵Xa ƥiy axe Simewon: Yemu’el, Yamin, Ohad, Yakin, Soxar fa Sawul fee o ƥiy no tew o Kaakanaan oxe. Weene ndefu a qaw ake mbaqaqoorna na Simewon.

¹⁶Keeke ndefu a kon ake na xa ƥiy axe Lewi fo xa taan den: Geerson, Kehat fa Merari. Lewi a ñoow’a xa kiid teemeed fo xa kiid qarɓeen tadik fo xa kiid ɓetaa ƭaq.

¹⁷Weeke ndefu xa ƥiy axe Geerson: Libni fa Simey ndefna a qaw ake mbaqaqoorna na Geerson.

¹⁸Weeke ndefu xa ƥiy axe Kehat: Amram, Yisxar, Hebron fa Usi’el. Kehat a ñoow’a xa kiid teemeed fo xa kiid qarɓeen tadik fo xa kiid xa tadaq.

¹⁹Weeke ndefu xa ƥiy axe Merari: Maxli fa Muusi. Weene ndefu a qaw ake mbaqaqoorna na Lewi fo xa taan den.

²⁰Amram, Yokebed fee faap o tew um a dolnoogu too a rima fo ten a Aaroon fa Moyiis. Amram a ñoow’a xa kiid teemeed fo xa kiid qarɓeen tadik fo xa kiid ɓetaa ƭaq.

²¹Weeke ndefu xa ƥiy axe Yisxar: Koora, Nefeg fa Sikiri.

²²Weeke ndefu xa ƥiy axe Usi’el: Misa’el, Elsafan fa Sitiri.

²³Aaroon, Eliseba fee o ƥiy Aminadab a dolnoogu, o cigeen Naason, too a rima fo ten a Nadab, Abiihu, Eleyasaar fa Itamaar.

²⁴Weeke ndefu xa ƥiy axe Koora: Asiir, Elkana fa Abiyasaf. Weene ndefu a qaw ake mbaqaqoorna na Koora.

²⁵Eleyasaar fee o ƥiy Aaroon, o leng na xa ƥiy axe Puti’el a dolnoogu too a rima fo ten a Finees. Weene ndefu kelfa ke na qaw ake mbaqaqoorna na Lewi.

²⁶No weene mat Moyiis fa Aaroon a mbaqaqooru, den we o Yaal oxe a layna yee: «Sutyo Ii-isra’el we fop kam saax le Misira.»

²⁷Moyiis fa Aaroon weene o mat lay’u fa Firawon fee o maad Misira, ndax ta sut Ii-isra’el we no saax laa Misira.

²⁸O Yaal oxe a laya fa Moyiis no saax laa Misira yee:

²⁹«Mi refu o Yaal oxe. Layi a Firawon fee o maad Misira ke um laykang fop.»

³⁰Maaga, mbaambir no Yaal oxe, Moyiis a doona yee: «Andaa yee xooliim fa lay, yaaga koy, nam Firawon fee a nan-gilooritkaxam?»