Read NQAARIIT NE ROOG A sutax ale 7 Bible Online

A sutax ale 7 - NQAARIIT NE ROOG bible

A sutax ale 7

¹O Yaal oxe a doona a Moyiis ee: «Xam fi o jeg sañ-sañ fa inooru na Roog mbaambir Firawon fee, soo Aaroon fee o maag of a ref o coojo’it of.

²Wo na laykaa a Aaroon fee o maag of ke um hebilkang fop, soo ta lay a Firawon fee ta xaƴ Ii-isra’el we da sutoox saax um.

³Mi o mat, xam ŋajnoor a Firawon fee. Xam fi xa anddiloor fo comlaand mayu kam saax le Misira,

⁴ndaa Firawon fee nan-gilooxkee a nuun. Xam doon o ɓay es took Misira, sut teen Ii-isra’el we ndefna xeet es soo xawin a qaw a ƭomu.

⁵Yaa um letinkaa o ɓay es took Miimisira we, sut a ndeer den Ii-isra’el we, xan Miimisira we a and ee mi refu o Yaal oxe.»

⁶Maaga, Moyiis fa Aaroon a mbi’a deŋ ke o Yaal oxe a hebilna a den.

⁷Moyiis a jeg’a xa kiid qarɓeen ɓetuu tadik, soo Aaroon a jeg xa kiid qarɓeen ɓetuu tadik fo xa kiid xa tadaq, ye da layaa fa Firawon fee.

⁸O Yaal oxe a laya a Moyiis fa Aaroon ee:

⁹«Boo Firawon fee a xoyna a nuun, a lay a nuun ee: ‹Mbi’yo njomlaand›, fat o lay a Aaroon ee: ‹Jangi o loq ole wo, deɓin mbaambir Firawon fee, too xan a suptoox fangool.› »

¹⁰Moyiis fa Aaroon a ndalfooxa o ndet paam Firawon fee too a mbi’a ke o Yaal oxe a hebil’ina a den. Aaroon a deɓa o loq ole ten mbaambir Firawon fee fo mbaambir dag we ten, too o loq ole a suptooxa fangool.

¹¹Firawon fee o mat a xoyna ɗeet we fo ñaañango we Misira. Yaal-o-and weene koy, a mbi’a leng kut ke Aaroon a fi’na.

¹²Den fop a ndeɓa xa loq den, too xa loq axe a suptooxa pangool. Maaga, o loq ole Aaroon a ɗuuda xa loq axe den.

¹³Firawon fee a ŋaja too a fañata o nan-giloox a Moyiis fa Aaroon, ne o Yaal oxe a layit’uuna.

¹⁴O Yaal oxe a laya a Moyiis ee: «Firawon fee kaa ŋaj too kaa fañ o xaƴ xeet fee da ndet.

¹⁵Ɓiiɓi maa Firawon fee o feet. Xan a sutoox, a ret na foofi laa, too fat o laamiisoor fo ten na ƥeeraamb alaa no xuluɓ olaa Niil. Fat o saq no ɓay of o loq ole suptoox’ina fangool,

¹⁶too fat o lay a Firawon fee yee: ‹O Yaal oxe refna Roog fee in, in Hebre we, luliidaxam me wo. Kaa tee: Xaƴi xeet es da ndet, a mbaɗookaam kam a koƥ-a-ƥor alaa, too yaaga boo ndiik naniro.

¹⁷Keeke o Yaal oxe a layu: No jaf leeke o andkaa yee mi refu o Yaal oxe. Ten o mat heblaxam, ndax um xaw poofi ke no xuluɓ ole fo o loq ole saquuma no ɓay es, too xan da suptoox fo’oy.

¹⁸Xan liƥ ke ndefna no xuluɓ ole a nqon, o xuluɓ ole a yaqoox, too Miimisira we xan a saƭakinoox o yer foofi le no xuluɓ ole, ndaa mbaagkiran. Keene o mat o Yaal oxe a layu.› »

¹⁹O Yaal oxe a laya a Moyiis ee: «Layi a Aaroon ta jang o loq um, a letin o ɓay um farna fo poofi ke Misira: Na xa maag xa maas axe fo na ƈufnand ake fo no peel ke fo na tuf ake fop, ndax poofi ke a suptoox fo’oy. Xan a jeg fo’oy kam saax le Misira fop, boo na xa calag axe sexeena fo na xa calag axe maxeena.»

²⁰Moyiis fa Aaroon a mbi’a ke o Yaal oxe a heblitna. Aaroon a yoɗa o loq ole, a xaw poofi ke ndeeƭna kam o xuluɓ ole na kid Firawon fee fo mbaambir dag we ten, too poofi ke no xuluɓ ole fop a suptooxa fo’oy.

²¹Liƥ ke ndeeƭna kam o xuluɓ ole fop a nqona, o xuluɓ ole a yaqoox boo Miimisira we mbaagatee o yer foofi le no xuluɓ ole, too saax le Misira fop a maya fo fo’oy.

²²Yaal-o-and we Misira a mbi’a leng kut ke Aaroon a fi’na. Firawon fee a ŋaja too nan-gilooxee a Moyiis fa Aaroon, ne o Yaal oxe a layit’uuna.

²³Firawon fee a nomtooxa, a xaad no mbind um soo a fañ o ɓek keene fop no xeeñ um.

²⁴Miimisira we fop kaa mbaqoogu paam o xuluɓ ole Niil, ndax da njeg foofi fo yerel, yaam mbaag’ee o yer foofi le no xuluɓ ole.

²⁵Ye o Yaal oxe a xawna o xuluɓ ole koy, ñaal ɓetuu ƭik a mbaafa.

²⁶Cinj ñaal ɓetuu ƭik keene koy, o Yaal oxe a laya a Moyiis ee: «Reti maa Firawon fee, layin ee: ‹O Yaal oxe kaa tee: Xaƴi xeet es da ndet, a mbaɗookaam.

²⁷Boo fañanoona o xaƴ, xam xaw saax le fop ne ta fodeena fo a paaɓ.

²⁸Xan o xuluɓ ole Niil a humbit fo a paaɓ. Xan a sutoox, a ndok kam mbind of fo kam a ndok ale o fe’aa, a ŋaay took njong of. Xan a ndok kam pind ke no dag we wo fo no pind ke na xeet fee wo, too xan a ndok kam xa cuɗand puuru xe wo fo kam xa qiiwir mbiɗel axe wo.

²⁹Xan a paaɓ ake a ŋaay took of sax fo took xeet of fo took dag we wo fop.› »