Read NQAARIIT NE ROOG A sutax ale 8 Bible Online

A sutax ale 8 - NQAARIIT NE ROOG bible

A sutax ale 8

¹O Yaal oxe a layahina a Moyiis ee: «Layi a Aaroon ta letin o ɓay um fo o loq ole ten farna fo xa quluɓ axe fo na ƈufnand ake fo no peel ke, a sut a paaɓ ake, da ndok kam saax le Misira.»

²Maaga, Aaroon a letna o ɓay um farna fo poofi ke Misira fop, too a paaɓ ake a sutooxa, a ndok kam saax le Misira, a muurin.

³Kaa koy, yaal-o-and we a mbi’a leng kut ke Aaroon a fi’na too a ndokna a paaɓ kam saax le Misira.

⁴Maaga, Firawon fee a xoyna a Moyiis fa Aaroon, a lay a den ee: «Nqeɗooxyo o Yaal oxe, ndax ta riƈat a paaɓ ake me mi fo na xeet fee mi, too yaaga xam xaƴ xeet fee Isra’el da ƥoxotik o Yaal oxe sadax.»

⁵Moyiis a laya a Firawon fee yee: «Daali maad, layaam rek a mbane um xeɗooxankang o Yaal oxe, wo fo dag of fa xeet of, ndax ta riƈat a paaɓ ake me wo fo no pind ke wo bo ta yoqaa ake no xuluɓ ole Niil soom.»

⁶A doona yee: «O feet bugum, da ndiƈatoox.» Maaga, Moyiis a laya yee: «Neene mat a refitkaa, ndax o and ee o leng fodee fo o Yaal oxe Roog in.

⁷Xan a paaɓ ake a ndiƈatooxong, a ndiƈatoox pind of, a ndiƈatoox dag of soo a sutoox saax of. Ake no xuluɓ ole rek na yoqkataa.»

⁸Moyiis fa Aaroon a ndalfooxa o sutoox mbind Firawon fee. A cinj ye Moyiis a sutooxna boo a goƭik, a xeɗooxa o Yaal oxe no kaa farna na paaɓ ake, ta xawit’ina a Firawon fee.

⁹O Yaal oxe a fi’a ke Moyiis a xeɗooxooguuna, too a paaɓ akaa fop a nqona kam tok ke fo na xa maax axe fo na xa qol axe.

¹⁰A mbokate a cuum a cuum, too saax laa fop kaa xooñoogu.

¹¹Ye Firawon fee a ga’na yee fop a riimaa, a ŋaja, a fañ o nan-giloox a Moyiis fa Aaroon, ne o Yaal oxe a layit’uuna.

¹²O Yaal oxe a laya a Moyiis ee: «Layi a Aaroon ta letin o loq um, a xaw lanq ke, da mbi fo ut. Xan a suptoox ƥook kam saax le Misira fop.»

¹³A mbi’a naaga. Aaroon a letna o ɓay um fo o loq ole, a xaw lanq ke, da mbi fo ut, a suptoox ƥook no wiin we fo no cegel ke. Fo ut ole no lanq ke fop a suptooxa ƥook kam saax le Misira.

¹⁴Yaal-o-and we a njeemooga fo o and den, ndax da sut ƥook ke, ndaa mbaag’iran. Ƥook ke kaa ñipoox’u wiin we fo cegel ke.

¹⁵Maaga, yaal-o-and we a laya a Firawon fee yee: «Roog fi’un!» Kaa koy, Firawon fee a ŋaja, a fañ o nan-giloox a Moyiis fa Aaroon, ne o Yaal oxe a layit’uuna.

¹⁶O Yaal oxe a laya a Moyiis ee: «Inooxi ƥiiɓ teel, ret maa Firawon fee. Xan a sutoox, a ret paam foofi laa. Layeen keeke layuuma, mi o Yaal oxe: ‹Xaƴi xeet es da ndet, a mbaɗookaam.

¹⁷Boo xaƴeeroona xeet es da ndet, xam ɓisiid xa baxal me wo fo na xeet of fo no dag of fo no pind of. Xan pind ke no Miimisira we a may fo a baxal, too xan da muur lanq ke.

¹⁸No ñaal naaga, xam jekit saax laa Goseen, me xeet es a genna. A baxal a leng jegkee maaga, ndax o and ee mi o Yaal oxe, mexey a ndeer saax leene.

¹⁹Xam fi njektir ndeer xeet es fa xeet of. O anddiloor oleene o feet a jege.› »

²⁰O Yaal oxe a fi’a naaga. A baxal a mayu a ndokiida kam mbind Firawon fee fo ke no dag we ten, too saax laa Misira fop a gefa yaam a baxal ake.

²¹Firawon fee a xoyna a Moyiis fa Aaroon, a lay a den ee: «Ndetyo ƥoxotik a Roog nuun sadax. Kaa koy, fat a ref kam saax le.»

²²Moyiis a doona yee: «Keene faaxee fi’el, yaam xan i ƥoxot o Yaal oxe Roog in sadax kaa na ngaañaa Miimisira we. Ndax bo i ƥoxotna na kid no Miimisira we sadax kaa na ngaañaa a den, mbaritkee a in a kac?

²³I mbuga o ñaaƴ ñaal tadik kam a koƥ-a-ƥor ale, ndax i ƥoxotik o Yaal oxe Roog in sadax, ne ta layitkan a in.»

²⁴Firawon fee a laya yee: «Xam xaƴ a nuun nu ƥoxotik o Yaal oxe Roog nuun sadax kam a koƥ-a-ƥor alaa. Kaa koy, ba nu ngoƭ nu ŋadangaa boo ndet, too ba nu ñakaam o nqeɗan.»

²⁵Moyiis a doona yee: «Xam sutoox mbind of, xeɗoox o Yaal oxe. O feet a baxal ake a ndiƈatooxong, wo Firawon fo dag of fa xeet of. Jaf leeke koy, ba o naxat a in. Fat o xaƴ xeet fee da ƥoxotik o Yaal oxe sadax.»

²⁶Moyiis a sutooxa mbind Firawon fee, a xeɗoox o Yaal oxe.

²⁷O Yaal oxe a fi’a ke Moyiis a xeɗooxooguuna, too a baxal ake a ndiƈatooxa a Firawon fee fo dag um fa xeet um, too yoq’atee a baxal a leng.

²⁸Kaa koy, no jaf laaga itam, Firawon fee a ŋajahina too a faña o xaƴ xeet fee da ndet.