Read NQAARIIT NE ROOG A sutax ale 9 Bible Online

A sutax ale 9 - NQAARIIT NE ROOG bible

A sutax ale 9

¹O Yaal oxe a laya a Moyiis ee: «Reti maa Firawon fee, layin ee: ‹O Yaal oxe refna Roog in, in Hebre we, kaa tee: Xaƴi xeet es da ndet, a mbaɗookaam.

²Boo fañoona o xaƴ a den da ndet mbaat o dam a den,

³xan o ɓay ole no Yaal oxe a dal took xa siir of axe ndefna kam xa qol axe. Pis ke fo xa paam axe fo keeleemb ke fo naak ke fo a ked ake, xan a warit a den piste fa ƭomu.

⁴Xan o Yaal oxe a fi njektir ndeer xa siir axe no Ii-isra’el we fo xa siir axe no Miimisira we too warkee dara na xa siir axe no Ii-isra’el we.› »

⁵O Yaal oxe a dalna waxtu fee ta fi’kaa keene, a lay ee: «Mi o Yaal oxe, o feet o feet um fi’kaa keene kam saax le.»

⁶No feet olaa o Yaal oxe a fi’a ke ta lay’ina. Xa siir axe no Miimisira we fop a nqona, too njegel leng na xa siir axe no Ii-isra’el we xonee.

⁷Maaga, Firawon fee a lula wiin da laamtik no ke xew’ina. Ye da ngarna, a layaan ee: «Njegel leng na xa siir axe no Ii-isra’el we xonee.» Kaa koy, Firawon fee a ŋaja, a fañ o xaƴ xeet fee da ndet.

⁸O Yaal oxe a laya a Moyiis fa Aaroon ee: «Yipyo xa ƥay nuun ndaw ndoxand, too fat Moyiis a deɓin farna fa asamaan fee mbaambir Firawon fee.

⁹Xan a suptoox fo ut olaa na muurkaa saax le Misira fop, too xan a fi a ur a ƭomu kaa na ndamkaa wiin we fo cegel ke kam saax le Misira fop.»

¹⁰Moyiis fa Aaroon a naqa ndaw, a soƥik a Firawon fee, too yaa da mbadna, Moyiis a deɓaan farna fa asamaan fee. A fi’a a ur, da ndam wiin we fo cegel ke.

¹¹Maɗag we Misira mbaag’ee o njasnoor fa Moyiis yaam a ur ake. Den oo kaa ndaaw’u teen nen Miimisira lakas we fop.

¹²O Yaal oxe a ŋajnoora a Firawon fee, too Firawon fee a fañata o nan-giloox a Moyiis fa Aaroon, ne o Yaal oxe a layit’uuna a Moyiis.

¹³O Yaal oxe a laya a Moyiis ee: «O feet, fat o inoox ƥiiɓ teel, ret maa Firawon fee, layin ee: ‹O Yaal oxe refna Roog in, in Hebre we, kaa tee: Xaƴi xeet es da ndet, a mbaɗookaam,

¹⁴yaam no jaf leeke, nuu taamaala a nandna, xan a dalong, wo fo dag of fa xeet of, ndax o and ee took lanq ke fop o leng fodee fa mi.

¹⁵Um letin’angaa o ɓay es, xawtong piste, wo fa xeet of, nu moockooga no lanq ke,

¹⁶ndaa kaam xaƴong o laaw of a fiɗaa, ndax o ga katil es, gon es a yegnitel kam adna fee fop.

¹⁷Boo inooxanahinoona xeet fee mi, fañin o xaƴ,

¹⁸o feet na waxtu feeke, xam fi a teƥ a kalam a ƥuuɓu a maak alaa andoona yee mosee o jeg Misira na bes faa ta sinjeena boo no ñaal roog ne xaye.

¹⁹Yoogi xa siir axe wo fo fop ke jegoona kam xa qol axe. Xan a kalam a ƥuuɓu ke a yen took wiin we fop fo took cegel ke fop na ndefkaa kam xa qol axe. A ngatangee no pind ke, xan a nqon.› »

²⁰We mbog’ina no dag waa Firawon fee too a niw fa lay fee no Yaal oxe, a ƥisiida surga ke den fo cegel ke den no pind ke,

²¹ndaa we a ƭat den a yong’eerna na fa lay fee no Yaal oxe, a nqaƴa surga den fo xa siir den na xa qol axaa.

²²O Yaal oxe a laya a Moyiis ee: «Letni o ɓay of farna fa asamaan fee, ndax ta deɓiid a kalam a ƥuuɓu kam saax le Misira fop took wiin we fo took cegel ke fo took daaƭ le na xa qol axe no saax le Misira fop.»

²³Maaga, Moyiis a letna o loq ole ten farna fa asamaan fee, o Yaal oxe a fi ƭuuɗ fo xa kiiñaand, a deɓiid a kalam a ƥuuɓu. Neene mat o Yaal oxe a deɓtu a kalam a ƥuuɓu kam saax le Misira.

²⁴Roog fee a deɓooga a kalam a ƥuuɓu kaa yoonna fo xa kiiñaand. A teƥ ale kaa magin’u bo ta hup, too a nandu naaga mosee o jeg Misira, yaa ta sinjeena, a ref saax boo no ñaal roog ne xaye.

²⁵Kam saax le Misira fop, a kalam a ƥuuɓu ke a mbara ke reeƭna na xa qol axe fop, a mbar wiin we fo cegel ke. A mbara itam daaƭ le no lanq ke soo a maaf taxar ke ndeeƭna na xa qol axe.

²⁶Kam saax laa Goseen soom, maa Ii-isra’el we a ngenoogna, a teƥ ale a fad’eeru.

²⁷Maaga, Firawon fee a xoyna a Moyiis fa Aaroon, a lay a den ee: «No jaf leeke mi tooñu. O Yaal oxe o mat jofu, mi fa xeet es, i njuum.

²⁸Nqeɗyo o Yaal oxe, ndax ƭuuɗ ke fo a kalam a ƥuuɓu ke a mbat. Yaaga, xam xaƴ a nuun nu ndet, too o leng fañitkatee a nuun.»

²⁹Moyiis a doonaan ee: «Boo sutooxuuma teeru fee, xam yoɗ xa ƥay axe mi farna fo o Yaal oxe, xeɗin. Xan ƭuuɗ ke a ngeenoox, too xan a simid, ndax o and ee o Yaal oxe jegu lanq ke.

³⁰Kaa koy, andaam ee wo fo dag of nu saɗarafulee o Yaal oxe Roog.»

³¹Xa pasaak[4] axe fa lorso fee kaa ngaay’u, yaam kaa soƥ’u lorso fee a sog o luuxaa, xa pasaak axe a mbiɗaa.

³²Xa qos bele xe na mbaktaa o luux koy, ngaay’ee.

³³Maaga, Moyiis a sutooxa mbind Firawon fee, a ret tafil teeru faa, a yoɗ xa ƥay um farna fo o Yaal oxe, a xeɗin. Ƭuuɗ ke a ngeenoox, soo a teƥ ale na kalam a ƥuuɓu ke a simid.

³⁴Yaa Firawon fee a ga’na yee a teƥ ale na kalam a ƥuuɓu ke a simda, ƭuuɗ ke a ngeenoox, a bakaadahina, a ŋaj, ten fo dag um.

³⁵Firawon fee a moƴa o ŋaj too a fañata o xaƴ Ii-isra’el we da ndet, ne o Yaal oxe a layit’uuna a reefandin na Moyiis.