Read NQAARIIT NE ROOG Yob 1 Bible Online

Yob 1 - NQAARIIT NE ROOG bible

Yob 1

¹Kam saax laa Uus, a jeg’a o koor o ne’e Yob. O koor oxeene kaa woor’u too a jof. Kaa saɗar’u a Roog soo a wootooxaa paaxeer.

²A jeg’a xa ƥiy xa koor ɓetaa ƭaq fo xa ƥiy xa tew xa tadaq,

³a jeg cegel cuni ɓetuu ƭik na ked ake ten, keeleemb ke a ndef cuni tadik, qoox ke a ndef juni, soo xa paam xa tew axe a ndef teemeed ƥetik. Jaajal we no koor oxeene itam a siw’a lool, too ten moƴ’u o ref o siide no batand ne fop.

⁴Xa ƥiy xa koor axe Yob kaa mer’u o njaƥatiraa mbumbaay ne da mbi’oogna no pind den. A nqurooga itam jigeen daduk we den, ndax da ñaam, a yer fa den.

⁵Ñaal ke no mbumbaay ne a mbaaf’angaa, Yob a lultooga xa ƥeem da ngar soo ta ɓogid a den. No feet olaa, a inooxooga ƥiiɓ teel, a ɓoxotan oxuu refna na den sadax fa ndoxel, yaam kaa xalaatoogu yee: «Xeƈa xa ƥees axe ñakee o mbakaad, a saloox a Roog na qeeñ den.» Neene deŋ Yob a fi’toogun kili.

⁶Bes, malaaka ke Roog a ngara, a ngeenoox mbaambir no Yaal oxe, soo Saytaane o caajamb oxe a ref itam a ndeer den.

⁷O Yaal oxe a laamta a Saytaane yee: «Ndi mam inooro?» A doona o Yaal oxe yee: «Kaam widoogu adna fee.»

⁸O Yaal oxe a laya a Saytaane yee: «Ndax ga’aa a Yob fee o tag es? Jegee oxaa nandna fo ten no lanq ke. Kaa ref o kiin o booru too a jof, a saɗar a Roog too a wootooxaa paaxeer.»

⁹Saytaane a doona o Yaal oxe yee: «Ndax o ƥor o ƥor taxu Yob a saɗarong?

¹⁰Mee ndax wo na saytooxan o saax oo saax, ten fo wiin mbind um fo o jeg um fop. Kaa o barke’an no kuu ta rokna, too xa siir um axe gañ kam saax le.

¹¹Duqangi rek o jeg ole ten fop boo ga, a wooraxam ee yaaga ta salooxong o nanaa.»

¹²O Yaal oxe a laya a Saytaane yee: «O ten oo xeene, xaƴaaxoong fo o jeg ole ten fop. Kaa koy, baa o ɓay of a dal took um, ten fa xoox um.» Maaga, Saytaane a inooxa mbaambir no Yaal oxe.

¹³Bes, a jopir xa ƥiy xa koor axe fo xa tew axe Yob a ñaamaa, a yeraa biiñ no mbind ne na taaw fee,

¹⁴o koor a gara, a lay a Yob ee: «Kaa i nqooxoogu fo qoox ke wo, soo xa paam axe a suufaa paam in,

¹⁵maaga Seeseeba we a yena took in, a njaɓ a den soo a mbarit surga ke wo laƥ. Mi doŋ ɓostooxu soo gar ndax um yegnong o ten.»

¹⁶Ye ta maadna o layaa, o lakas a fadiida, a lay ee: «Ƭuuɗ kaa yentiid na asamaan, a dal took ged laa fo took gaynaak we wo, a raaɓ a den. Mi doŋ mucu soo gar ndax um yegnong o ten.»

¹⁷Ye oxeene a maadna o layaa, o lakas a fadiida soo a lay ee: «Kaakalde waa kaa mbi a yaj a tadak, a ndigan keeleemb ke, a njaɓ a den soo a mbarit surga ke wo laƥ. Mi doŋ ɓostooxu soo gar ndax um yegnong o ten.»

¹⁸Ye oxeene a maadna o layaa, o lakas a fadiida, a lay ee: «Xa ƥeef xa koor fo xa tew axe kaa ndeeƭu no mbind no maag den oxe refna taaw, a ñaamaa, a yeraa biiñ,

¹⁹soo nqeñ maak njegu doole a inoor farna fa koƥ-a-ƥor alaa, a maaf kooñ nahik ke no tabax ne, ta yen took den, too den fop a nqona. Mi doŋ mucu soo gar ndax um yegnong o ten.»

²⁰Maaga, Yob a inooxa, a faar sabadoor ne ten, a ruusoox ɓula, a gung a lanq

²¹soo a lay ee: «Ɓisiidiim dara ye um garaa na adna, too ɓislooxkiim dara yaa um retaa. O Yaal oxe ci’tu, ten jangu. Yaasam gon le no Yaal oxe a simatel!»

²²No kaaga fop koy, Yob bakaadee took o ŋañaa a Roog.