Read NQAARIIT NE ROOG Yob 10 Bible Online

Yob 10 - NQAARIIT NE ROOG bible

Yob 10

¹Bugatiim o ga o ñoow! Waagatiim o tiimit ƭomatax es. Xam lay kam fa mbagu es.

²«Wo Roog, ba o ŋaaynaam a ƭat! Andnooraam ke taxna o ñoxoraa fa mi.

³Ndi xar a jiriiñong o toroxandaxam, deɓ jale na xa ƥay of, soo sawar no yuuƥ ke no soxodu we?

⁴Ndax a ka’ooƭ of kaa ref a ka’ooƭ no kiin, ndax ne wiin we a nga’taa nga’it o ga’taa?

⁵Ndax ñaal ke wo kaa njaakee nen ñaal no kiin, xa kiid axe wo a mayaƭar nen xa kiid um,

⁶boo a tax o waaƭaa tooñ es, naaɓaa bakaad es?

⁷Andaa xil ee tooñiim, too o leng waagee suqit tig na xa ƥay of?

⁸Xa ƥay of moolaxam, a sakaam ne fodeema fop, soo o saŋikkaxam neeke!

⁹Wetandooxi yee wo mooltaxam ƭok. Ndax kaa o bugaam o nomit no fo ut ole?

¹⁰Ndax mooliraamo no fud ya es, ne fo sis a hagniteel no roon?

¹¹Wo hulaxam ƭool fo a nex, wadaam xa kiiƈ fo xa pamb.

¹²Ci’axamo o ñoow, fexaam, gaynaakaa o ñis es.

¹³Ndiiki koy, andataam ke fofoona no xeeñ of. Fop ke dalaxama, kaa o ɗasin’aam o ten kam of.

¹⁴Kaa o cungoogu rek um bakaad, ndax o xawaam.

¹⁵A soƥangaa yee mi tooñu, sabab took es! Um dam’angaa na ƭat sax oo, kaam war o lupandoox, mi fee mayna gaci fa naqad.

¹⁶Mexaa yoɗaa xoox es, o daabaam nen njogoy, xawtahinaxam com’andtu ke wo.

¹⁷Kaa o siiknoortaa fa mi seede xas, fuux of na mi a moƴ o umboox, o hebliid took es taamaala pagkatar nen a yaj no xiixire xas.

¹⁸Xar taxu o suttaam no fud ya es? Um xonit maaga moƴan’axam, too a ngid a leng doonooxkoogee took es.

¹⁹Yaaga inoorkoogaam no fud ya es, rok na mboy, nand nen oxaa moseerna ref.

²⁰Ke yoqɗuuma no ñoow mayee dara! Fat o waasaam, goƭaam, ndax um haaƭ o ndik,

²¹boo um helko fo retaa kam saax le no niɓaan ole fo a pelyook ale na fa nqon fee, too garkatiim,

²²saax le no niɓaan taruus ole, a pelyook ale na fa nqon fee, me njaxasax ne a maadooxaa fo me a qoolaand ale a nandtaa fo o niɓaan.»