Read NQAARIIT NE ROOG Yob 11 Bible Online

Yob 11 - NQAARIIT NE ROOG bible

Yob 11

¹Sofaar fee genna Naama a janga fa lay faa yee:

²Ndax fa lay fa mbagkeer fene jegkee o doonanqol? Ndax mbel-o-ɗek na taxkaa o jeg ndigil?

³Ndax foogaa yee xa kaaywaay axe wo na tiimnoorkaa wiin we boo o waag o xaadnoox, too o leng xasankirang?

⁴Kaa o layaa yee: «A pesoorooƭ es jegee soqel, too xoolaam mbaambir Roog.»

⁵Cey! Um waag’angaan Roog a lay fa wo koy, a yaƥat o don um ndax ta doonong!

⁶Yaaga a feeñilkoogaang kunpa ke no and ole ngaritna o kiin took, too ga’koogaa yee damanirang mayu no pakaad of.

⁷Ndax foogaa moos ee waagaa o ɓaal o yaajel ole Roog, fagiɗ o magnel ole no Cegu katil oxe?

⁸Ten moƴu o goƭ a eel ake took: Xar waago fi? Ten moƴu o xooɗ a jaaniif: Xar o andkaa teen?

⁹Ten moƴu o yaaj lanq ke, a moƴ o magin juwaam fee.

¹⁰Boo Roog a feeñna, a dam o kiin, a xoyit nqeloor, an waagun o dek?

¹¹Roog a anda wiin jaree tus we too kaa ga’aa no yooɓu we na tooñaa.

¹²Kaa koy, muu o faam-a-koƥ a rimitna o faam mbind, o ƭof a waaga fesit maaga o ƈiƴ.

¹³Wo koy, boo ɓakandoona xeeñ of na Roog, dekin xa ƥay,

¹⁴goƭatir fo njofaƭar of, sut paaxeer no mbind of,

¹⁵yaaga, xan tagid of a let, kam of a xool qac, o saƭik koŋ too saɗarkiro dara.

¹⁶Xan o weec coono ke wo, wetandooraa a den nen o jaɓ o faafu.

¹⁷Ñaal ke wo na moƴkaa o nqool njeeƈ ndeer xoox, o niɓaan of a nand nen a qoolaand nqes.

¹⁸Xan kam of a dalat, yaam o jegat yaakaar. Xan o saytooxel soo gen no yaadax.

¹⁹Xan o letnoox, too o leng jom’andkirang, mayu a mbaaƭaa o njegir fa wo.

²⁰Kaa koy, xan a kid no soxodu we a nqooɗat. Njegkee njaɓnooxand leng, yaakaar den a ref fa nqon!