Read NQAARIIT NE ROOG Yob 12 Bible Online

Yob 12 - NQAARIIT NE ROOG bible

Yob 12

¹Yob a laya yee:

²No ndigil, ngiin me nuun a dayu, too nuun waa nqonaa, o and ee mes.

³Mi itam jegaam yiif nen a nuun. Nu ngupiraam o and. Ndi an andeeru ke nu ne’aa sax?

⁴Kaam ref no qaariit es qaadnooxel, mi fee ƴufginooxoogna a Roog, ta jaaɓaam! Ke jofuuma fop oo, ñak soqel, yaqanee um ref calat!

⁵«Toroxu we njagtu o xeefel!» Keene refu o og ole ɗaayu we a layaa. Kaa ŋañtan oxe a caf um a sendaa.

⁶Saasaay ke o mat kaa ndef na jam kam ƭiif den, we na tooñaa a Roog a ndef no woor, doole den soom a ref roog den.

⁷O laamtangaa muumeen ke, xan a njangnong, o laamit tiiƭ ke, da aqatinong,

⁸ƥood ke no lanq ke, da andnoorong, soo liƥ ke no maag ole, da layong ke da andna.

⁹An na den fop andeeru yee o ɓay no Yaal oxe fi’u keene?

¹⁰Ten saqu o ñis no pindel ke fop, haaƭ no kiin oxuu na ñoowaa.

¹¹«Ndax refee yee nof na jaqtirandaa fa lay, ne o ɗanqarlam a anddirandtaa a safaand ñaamel?

¹²Ndax refee yee nogoy we saqu o and, o jeg-yiif a ref no xuuɗ-o-ñis?»

¹³Kaa koy, Roog jegu o and fa katil, a jeg njaqtirand fo o jeg-yiif.

¹⁴Ke Roog a jiƭitna, maxatinkaand, too oxe ta wegna, wetkaand.

¹⁵A damangaa poofi ke, fop a naang koroŋ, ta xaƴ a den, lanq ke a yaayoox.

¹⁶Ten jegu doole, a waag fop, oxe mo’na yoo, oxe na mo’nooraa yoo, ten na harnaa a den.

¹⁷Kaa gadooxnooraa aa-as we xa ñaaƭ den, a ñaknooraa kelfa ke sagu den.

¹⁸Kaa wolaa lori ke no maad we, a luq a den.

¹⁹Kaa gadooxnooraa saasadax we xa ñaaƭ den, a maafaa yaal toole ke.

²⁰Kaa sañtaa fa lay fee no we nqoolna ɗelem, nogoy we, ta suqit na den njektirand.

²¹O xeefel ole, kaa roxondan gelwaar we, a yelefand a keen no jegu doole we.

²²Kaa huytaa ke ɗasna kam ee kam o niɓaan ole, a pelyook ale na fa nqon fee, ta ɓekin na qoolaand ale.

²³Ten na saqtinaa qeet ke, a saŋkaa a den, ten na ɗaayaa o fiisel den, a pasaraa a den maa goƭna.

²⁴Kaa ñaknooraa kelfa ke no qeet ke sagu den. Kaa joqooynooraa a den kam a koƥ-a-ƥor alaa jegeerna a ƭat,

²⁵da naƥnaa kam o niɓaan taruus, a tifil-tifilnaa nen o kiin o bayu.