Read NQAARIIT NE ROOG Yob 13 Bible Online

Yob 13 - NQAARIIT NE ROOG bible

Yob 13

¹A ngid es a ga’a keene fop, nof es a nanin, too andaanum a paax.

²Kuu nu andna, andaanum mi yoo, nu ngupiraam o and.

³Kaa koy, kaam bug o lay fo o Cegu katil oxe, xoxit a xoox es mbaambir Roog.

⁴Nuun o mat, kaa nu ngulaa o moon took njong, ndef fan sirkañ, nuun fop.

⁵Kaa nu mbaagee o naang cuxus! Nu mbi’angaan de, nu ƭeetkooge nen jegu o and.

⁶Kaa um xeɗaa a nuun nu nan-giloox nqeloor es, ndung nof nuun no nqañax es.

⁷Ndax kaa nu mbartitkaa a Roog kaa jegeerna, sedanin fo xa maaƥ?

⁸Ndax kaa nu mbug o mbar fo ten, layooranin?

⁹Ndax xan a mal a nuun, yaa ta ɗeetlooxkaa a nuun, ndi kaa nu naxitkan ne o kiin a naxteel?

¹⁰A woora yee nu mbartangaan na pet sax oo, xan a xaw a nuun.

¹¹Ndax kaa o magnel ole ten diidlandee a nuun, o saɗarin a dam a nuun?

¹²Xa as axe nuun kaa nand nen ndaw, o doonanqol nuun a ref nen pegoor pi’te ƭok.

¹³Tiimyo too mbaasaam um lay! Fat kuu na dalkaxam teen a dalaam!

¹⁴A jaranaxam um ñak o ñoow es, xar na taxkaa um doon o ñis es no xoƥ nquƭ?

¹⁵A bug oo waraam, a ƭat es yongee teen! Kaa rek, xam xoxit a xoox es mbaambir um.

¹⁶A keenax es mbaambir um sax a waaga rim a muc es, yaam o yememaar saɗee jasnoor fo ten.

¹⁷Nan-gilooxyo, kaam ee nu nan-giloox fa lay es, ndung nof nuun no ke um layiidaa.

¹⁸Mexey layooraniidaa a xoox es too andaam ee no ndigil damum.

¹⁹An saɗu layoor fa mi? Yaaga xam tiim soo xon.

²⁰Kaa rek, ci’aam tig ƭik doŋ, yaaga moofkatiim ɗasang.

²¹Baa o ɓay of a dalat took es, too ba o jom’andtataam a qufil ake wo!

²²Cinj kaaga, layi fa mi, um doonong, mbaat um lay, o doonaam!

²³Nam tooñ ke fo pakaad ke mi a mbodu? Andnooraam njofaƭar es fo pakaad es.

²⁴Xar taxu o xuunaam, fi’aam o pañ of?

²⁵Ndax mi o xufaa, mi fee refna a naf alaa nqeñ a maƥna? Ndax mi o daabaa, mi fee refna a tuuduuy a beeru?

²⁶Wo doonaxam coono ƭomu keene, xawtaxam tooñ ke no ndeƥandoong es.

²⁷Kaa o saarnaam, gayaa fop ke um fi’aa, hapan xa caf es me da mbarna o nday,

²⁸a soƥangaa sax ee cer es kaa yastooxaa, yaam a mbot ɓaskañ, nen ñirax naa max a ŋereñna.