Read NQAARIIT NE ROOG Yob 15 Bible Online

Yob 15 - NQAARIIT NE ROOG bible

Yob 15

¹Maaga, Elifaas fee genna Temaan a jangahina fa lay faa yee:

²«Ndax o yaal-o-and neene a doontaa, fa lay um a ref yaq a ƥay o don?

³Ndax fa lay fa ngoɓong a xoxtitaa a xoox um, a felaatoorteel xa kasaƥ xa ƥor?

⁴Wo sax, kaa o yaqataa o saɗar a Roog, ñufaa a paɗax ale.

⁵Tooñ of na laynoorang, o jaɓnooraa fa lay no ƴiƴ we.

⁶O don of xaƴong a malook, ndaa refee mi, ɗelem of a roknoorong.

⁷Ndax wo eete o rim no wiin we, ndi wo sax maagu xa coong axe?[4]

⁸Ndax maadaa mbokatax ne Roog, boo jegooxaa o and, wo soom?

⁹Xar ando kaa i andeerna, xar xoolong soo a ñaam a in?

¹⁰No maak waa i nqottu o and ole in, no nogoy waa ngupna a faap of xa yeng.

¹¹Ndax kaa o damit caaxaan a yaal ale Roog, fa lay fa ƥuuɓu fee i layang?

¹²Ndi xar taxu xeeñ of a adnong, o yaxgin a kid of?

¹³Me ta refna koy, Roog o mat fuuxano soo ratataa juumaa neeke.

¹⁴Xar o kiin a refu bo tee kaa xool, kaam ee xar o ƥiy no kiin a refu bo tee kaa jof?

¹⁵Roog a hoolooxangee malaaka ke ten, asamaan fee a xoolangee mbaambir um,

¹⁶nam boog o mbindeef onqe jakalaarna too a laawoox a xoolitkaa mbaambir um, o kiin oxe fodandna njofaƭar fo a yer foofi?

¹⁷Nan-gilooxaam um layong, wetandooxong ke ga’uuma,

¹⁸ke yaal-o-and we a yegnitna, a nqottin no daan den too ƭasniran.

¹⁹Den soom Roog a ci’u saax le, too o kenar o leng ɓislooxee a den.

²⁰O soxodu xe kaa refaa no njom’andaan no ñoow o ñis um fop, xa kiid axe no kiin fo’oy oxe a ngapel.

²¹Fangax laa na diidlandaa kaa nannooxaa no nof um, o yaayaq oxe a waaslooxanan, yaa ta refna na jam.

²²Yaakaaratee o daɗ o niɓaan ole, laƥ ne a ref no ɓeedan,

²³o dal um a refik ñaamel a tud[5]. A anda xil ee o niɓaan ole na cungan.

²⁴Coono fo o njakad na ndiidlandan, a ndiganin nen o maad oxaa bugna o song.

²⁵Kaa ɗaayan a Roog o kurpeeñ, a paaƈ o Cegu katil oxe.

²⁶Kaa ƴuug rek, a waaslooxan a Roog, a singoor pegoor ndinqu um,

²⁷ke xa ƭek axe ten a naangna yuxur fop oo, ndiiñ um a ɗembet.

²⁸Kaa genoogu no teeru ke yaqeena, kam pind kaa mbar’ataandeena o ngen, njagandan’eena o ndefat juum kefatin.

²⁹Fokatanooxkatee halal, o jeg um maadkee o feet, too o neq um mayƭandkatee lanq ke.

³⁰Daɗkee fa nqon fee, xan ƈulfaan a dox saqit le ten, too xan buuƭ ne Roog a maƥin.

³¹A hoolooxangaa kañaan, xoox um rek a naxaa, yaam yaaga kañaan neene a rabidkeel.

³²Xan a leeƥ too hap um fadkee, saqit um neepkatee muk.

³³Xan a ɓooroor nen ndaxar biiñ naa a koƥ ake ten a mboorafuleerna, nen ndaxar oliiw naa piɗ ke ten a ƥoorooxna.

³⁴Ƥasil ne no soxodu xe saqitkee, too xan fiɗel a raaɓ pind ke maxteena a ƭat a qeleer.

³⁵Oxe na fudaa paaxeer, sabab a ñootaa, too o rim um naanaxir ƥor oo.»