Read NQAARIIT NE ROOG Yob 17 Bible Online

Yob 17 - NQAARIIT NE ROOG bible

Yob 17

¹Ñoot es kaa suxiidaa, xa yeng es a mbagiidaa, a mboy ale a cungaxam.

²Xaaxaadnax mbidaxam, too waagiim o sag a ngid yaam a ben ake den.

³Wo Roog, gadooxaam, wo fa xoox of, yaam a jolangaa wo, jegee oxaa na gadooxkaxam!

⁴Kaa o watin sagu no qaariit es, too ba o xaƴ a den da maafaam!

⁵Ba o ref na mi nen oxaa na roxaa lakas we, a xaƴ mbind um!

⁶Kaam fi’el calat no wiin we, duxdeel na mukit.

⁷A kid es kaa niifaar yaam naqad, cer es fop a nand nen yook.

⁸Wiin faaxu we xan a njaaxiɗ no ke damaxama, jofu we a inooxanaam nen oxaa a ƭat um a yongeerna na Roog.

⁹Kaa da layaa yee: «O cofu xe kaa damaa a ƭat um nuu ta saxitna saxit, oxe xa ƥay um a nqoolna a moƴ a moƴ o saƭkaa.»

¹⁰Kaa koy nuun fop, nomtooxiidyo, njeepeetatin fa lay nuun, too a woora yee ga’kiim na nuun oxaa jegna o and.

¹¹Xa yeng axe mi owe mbaafaa, yuuƥ ke mi a kasaara’oox, yaakaar es a tas.

¹²Kaa nu njangaa o yeng ole, ne’in ñaal, lay ee a qoolaand ale a matiida, a niɓaanangaa sax oo.

¹³Jaaniif um cungaa, ta ref ngenand es, njong es, um sipin kam o niɓaan ole.

¹⁴Kaam layaa a mboy ale yee: «Wo refu faap es!», max ke, um lay a den ee: «Nuun ndefu ya es fo jigeen es!»

¹⁵Taa yaakaar es boog? An waagun o ga?

¹⁶Yaakaar es xan a ginglel kam jaaniif, yaa i yoonkaa ñootnook kam lanq ke.