Read NQAARIIT NE ROOG Yob 19 Bible Online

Yob 19 - NQAARIIT NE ROOG bible

Yob 19

¹Maaga, Yob a laya yee:

²Nuun o mat, kaa nu mbugko njom’andaxam boo a mban, mbaraxam fo fa lay?

³Nu ŋañaxam a caf xarɓaxay, too nu sedee moof mbaxnaxam xa ñuxur?

⁴A soƥangaa sax ee mi dameeru na ƭat, a ƭat nuun yongee teen.

⁵Nu mboogangaa yee nuun moƴaxam boo ngadnaxam ke dalaxama,

⁶fat nu and ee Roog tooñaxam, a monjaam no mbaal um.

⁷Um faɗooxangaa yee: «Woy, mexe wareel!», o leng ƴufigkiraam, um ƴufginoox, o leng ɓoxotkiraam ɓur.

⁸Kaa weg a qal es boo waagatiim o suur, o ƭat es, ta niɓaannin taruus.

⁹Kaa ɓol o rand ole mi, o ndip onqe no xoox es ta muqtin.

¹⁰Kaa jiƭtaam o saax oo saax, um ref no moocaa, yaakaar es, ta naagin ɗipit nen ndaxar mbuure.

¹¹Fuux um kaa biltooxanaam, ta ɗeetaxam nen o pañ um.

¹²A yaj ake ten kaa mbokatoor a ngaranaxam, a sexanaam a ƭat, saŋe den, da sipin me widna ƭiif es.

¹³Kaa xaajaam fo fog es, um refat o kenar no we andaxama.

¹⁴Wiin mbind es kaa ndeɓaam, qaariit es tigi a mbeecaam.

¹⁵Genar we no mbind es fo jeefeer es kaa ƭeetataxam nen o gataakoon, um refat na den oxaa da andeerna.

¹⁶Um xoyangaa a surga es, jaaɓkiraam, um xeɗooxangaan sax oo.

¹⁷O tees bugatee tuñ ke mi, we i numna ƭeen leng, um xooñataa a den.

¹⁸Xa koor xa teɓ axe sax kaa nqeefaam, a nqaadnooxaxam, yaa um foƭtaa a caf es.

¹⁹Qaariit es tigi kaa mbasnooxataxam, we fex’uuma lool a mbesaam ndiiñ.

²⁰Ƭool es kaa taƥat na xa kiiƈ axe, um yoqat ndinglaañ ƥor.

²¹Nuun qaariit es, ngela yirmaamoo! Kaam ee nu yirmaam, yaam o ɓay Roog dalaxam.

²²Nu njaɓee ƥaat lakas no ke Roog a doonaxama! Ndax ke nu ngal’andaxama deyee dey a nuun?

²³Cey, fa lay es a waag’ange o bind rek, a ɓalginel no safe!

²⁴A sexit’ange o roomir, a soortel beteex, a ndef no ɓil le da sexkeel boo kili!

²⁵Andaam o mat ee o baawat es oxe ñoowaa, too ten na jegkaa o ñuxur o faktaand took lanq ke.

²⁶Boo ƭool es neeke a maxna, fo o meen es, xam ga a Roog.

²⁷Xam ga’oodin fo a kid es, haan no ten, too refee na mi o kenar. Xeeñ es kaa tayaa keene.

²⁸Nuun o mat, kaa nu laamtooxaa yee: «Nam i ñosombilitkan boo ta waag o lay ndigil ne, yaam a woora yee ten garu fo ke daluuna?»

²⁹Mbootooxyo laƥ a fand a nuun, yaam a pi a paaxeer fa nqon a jagtu! Fat nu and a paax ee o kaahate a jega!