Read NQAARIIT NE ROOG Yob 2 Bible Online

Yob 2 - NQAARIIT NE ROOG bible

Yob 2

¹Bes, malaaka ke Roog a ngarahina, a ngeenoox mbaambir no Yaal oxe, soo Saytaane, o caajamb oxe, a ref itam a ndeer den mbaambir no Yaal oxe.

²O Yaal oxe a laamta a Saytaane yee: «Ndi mam inooro?» Saytaane a doonaan ee: «Kaam widoogu adna fee.»

³O Yaal oxe a layaan ee: «Ndax ga’aa a Yob fee o tag es? Jegee oxaa nandna fo ten no lanq ke. Kaa ref o kiin o booru too a jof, a saɗar a Roog soo a wootooxaa paaxeer. Boo fa ndiik jegee soqel leng, ke taxaxamoona o ñaknoorin na xa koɓong fop oo.»

⁴Saytaane a doona o Yaal oxe yee: «O ñis a jara kuu refna. Ke o kiin a jegna fop a jaɓaan o cooxit ndax ta mucil o ñis um.

⁵Duqangi rek cer um boo ga, a wooraxam ee yaaga ta salooxong o nanaa.»

⁶O Yaal oxe a laya a Saytaane yee: «O ten oo xeene, xaƴaaxoong fo ten. Kaa koy, baa o xuuf o ñis um.»

⁷Maaga, Saytaane a inooxa mbaambir no Yaal oxe. Cinj kaaga, a xawta a Yob a ur a ƭomu, da nqotit no nqol mbangdir ne boo no ƭuf ne.

⁸Yob a moofa no ndaw[1], a gis o faambaar olaa ta ñaxañooraa.

⁹O teem a layaan ee: «Kaa o maadaa no ngor boo fa ndiik! Xar yaqanu o saloox a Roog soo xon, yaam ten moƴatu!»

¹⁰Kaa koy, Yob a doonaan ee: «Kaa o laytaa nen o tew o cegee yiif! Feek i njaɓa ndaawit na Roog paax kañ, i mbara njaɓ o ndaawit no ten paaxeer itam.» No kaaga fop koy, Yob bakaadee na fa lay um.

¹¹Qaariit tadik Yob a yega taamaala ke ndal’uuna fop. A yekoora, ndax da ƭomatook soo a yaalik a Yob. Weene ndeeƭu Elifaas fee genna Temaan fa Bildad fee genna Suwax fa Sofaar fee genna Naama.

¹²A ƈooktaan koƭu, ndaa andid’iran. Ye da mbadiidna boo a nga ee ten oo, a ndalfooxa o mbaɗoox, a mbaar toki den soo a isdaa lanq ke took, ta yipooxaa na qoox den.

¹³A moofa fo ten a lanq boo ñaal ɓetuu ƭik fo xa yeng den, too o leng na den layiran o ɗelem o leng sax, yaam a nga ne ta ɗomteel.