Read NQAARIIT NE ROOG Yob 20 Bible Online

Yob 20 - NQAARIIT NE ROOG bible

Yob 20

¹Maaga, Sofaar fee genna Naama a janga fa lay faa yee:

²Ke layoona taxu waagiim o ñak o doon, too waagatiim o dam a xoox es.

³O nqasan onqe nanuuma kaa feƭaraam, too xan yiif es a cooxaam ke waruuma o doon.

⁴Ndax andiro yee naa ta moofu moof, kaa xotitna yaa o kiin a sipeena took lanq ke,

⁵o ndam no soxodu xe miñee, o ɗaay no xe a ƭat um a yongeerna na Roog goƭee?

⁶A yoɗooxangaa boo na asamaan sax oo, xoox um a cuqaa a eel ake,

⁷xan a mooc nen a umbel, too we nga’ooguuna xan a laamit ee: «Taa ten?»

⁸Xan a sooƴ nen o ƭaaɗ too ga’kataand sen, a mooc nen mbeeñax o yeng.

⁹A ngid ale ɗeetooguuna ɗeetkatiran, o mbiñ onqe ta gen’ina ga’katiran.

¹⁰Xa ƥeem xan a nomit ke ta guuɗitna no rool we, we ta waasna meen, a ndakin ke ta jaɓ’ina.

¹¹Doole fee no ndeƥandoong um ta saq’ina xan a wondoox fo ten kam lanq ke.

¹²Paaxeer kaa fel no don um, ta muɓtin.

¹³Kaa geekan miñu a fañin o waas, a leerin no ɗanqarlam um.

¹⁴Kaa koy, a qoƴgaan ale xan a suptoox kam laaw um, a refat daŋat sax kam o fud um.

¹⁵Kalal ke ta ɗuudna, xan a xuq a den. Xan Roog a sutit a den no fud um.

¹⁶Ke ta ɓuusoogna kaa ref daŋat fangool. Ten na warkan nen ŋat o nqisiil.

¹⁷Doonkatee a ngid diwliin fa mbagkatar fee, ga’katee suum ke fo kagin ke naang’ina gañ.

¹⁸Xan a ɓoxot xa tim axe no jale um too muudoorkiran, fop ke ta kos-kosinna felakinoorkiran,

¹⁹yaam kaa toroxand o ndool onqe, a deɓin, a jaɓ pind kaa ta maxeerna.

²⁰Mbuge ne ten jeg’ee muk a tet, ndaa ke ta ƴufanaa mucilkiran.

²¹Dara waankee o buge le ten, ndaa o ɗaay um miñkee tus.

²²Kam o neq um xan naqad a dal took um, taamaala a sagooxin.

²³Yaa ta refkaa no yipaa o fud um, xan Roog a hebliid fuux ɗomu le ten, a joorin took um, ta ref a put um.

²⁴A daɗangaa ƥonax celem ke, xan a qali xanjar a roomin,

²⁵boo ta suur, weel le na kas ale a siidaa fo o soylaar ole, ta diid boo a bug o xon.

²⁶Taamaala ke fop kaa ngeekanel kalal ke ten, too xan fiɗel laa o kiin a heƥandeerna a raaɓin, ten fo we ngenna no ƭiif um fop.

²⁷Xan asamaan fee a weejil tooñ um, lanq ke a inooxanin.

²⁸Xan o jaɓ a leel mbind um fop, poofi kaa na ƈufaa, yaa fo fuux le Roog, a maƥin.

²⁹Keene refu a las ale Roog a kesanna soxodu we, o roxanqol ole ta geekanna a den.