Read NQAARIIT NE ROOG Yob 23 Bible Online

Yob 23 - NQAARIIT NE ROOG bible

Yob 23

¹Maaga, Yob a laya yee:

²Jeemaam o migin xa iin es, ndaa ɗaxee dara, ndiiki ƭomatax es a moƴu o jeg doole.

³Cey! Um and’angaa me um ga’itkaa a Roog, waag o retaa ret boo me ta genna,

⁴letinkoogaam mbaambir um wargal es, o don es a lay fop ke na lalitkaa ɓur es.

⁵Yaaga andkoogaam nam a doonitkaxam, ga ke ta laykaxam.

⁶Ndax doole um fop a xelooritkoogu fa mi? Ha’aa, ndaa kañ a nan-gilooxkoogaxam a paax.

⁷Yaaga a ga’kooga yee o kiin o cofu na felaatooraa fo ten, um ƴutoor fo o kaahate es boo kili.

⁸Kaa koy, um retangaa no batand, refkee maaga, um ret no mudand, ƴookkinum,

⁹um waaƭin no ɓemb-roog o janoon, ga’kinum, um widkin no ɓemb-roog o ñamaak, ndaa boo fa ndiik ga’iim tus.

¹⁰Yaag oo toox de, Roog a anda o jaf oluu um dakaa. A ɗeetlooxangaam boo a ƴut, xam sutoox teen qac nen wurus faa sutteena no jawir um.

¹¹Kaam reefaa xa caf axe ten deŋ, xot a ƭat um too ɗapiim sen.

¹²Yapatiliim kebil ke ten, geek o bug es, reefaa ole ten.

¹³Ten koy, a hebooxangaa tig, an na waagkan o sut teen? Ke ta bugna, kaa fi’an.

¹⁴Xan a fadin ke ta hebooxanaxama, too a yaxandooxanaxam yuuƥ lakas mayu.

¹⁵Keene mat taxu um diid mbaambir um. Nuu um yiiftan, neene um saɗartan.

¹⁶Roog kaa watin njambaar es, o Cegu katil oxe kaa foofdandaam.

¹⁷Kaa koy, o niɓaan ole taxiraam o tiim, ke ɓalgin le a muuraxama fop oo.