Read NQAARIIT NE ROOG Yob 24 Bible Online

Yob 24 - NQAARIIT NE ROOG bible

Yob 24

¹Xar taxu o Cegu katil oxe dalnee waxtu faa ta hate’aa soxodu we? Xar taxu we anduuna naangee nga’aa ñaal neene?

²Soxodu we kaa ndiƈataa a tet ake, a nguuɗaa xa siir soo a ngayaa a den nen kaa da njegna.

³Kaa njangaa o faam ole no waan ole, nqoox ne no ñaaw oxe, da nqotin nen ngaasnit.

⁴Kaa nqañtaa rool we wargal den, toroxu we no saax le a ƭasataa doŋ.

⁵Rool we kaa sutooxaa nen xa paam-a-koƥ, a mbaaƭtik ñaamel na koƥ-a-ƥor alaa. Njegee o mbiñ o lakas onqaa da mbaaƭanitna xa teɓandoong den ñaamel.

⁶Kaa ngisaatooxaa ke yoqna na xa qol axe, a picanqilaa na ƭing taxar biiñ ale no soxodu xe.

⁷Kaa mbe’aa duŋ yaam a ƥangid. Njegee kulooxel leng na cogoñ ale.

⁸A teƥ a ƥuuɓu ke na xa coong axe kaa nquƥandaa a den, da ƥegelooxaa na ƥil ake.

⁹Oxe jegateerna faap kaa suqtiteel no ƭeen ya um, o ƥiy onqe no ndool onqe a xotel, a rabditikel o lad.

¹⁰Kaa ñaaƴaa duŋ yaam a ƥangid, a ndoxondooxaa a kusax no lakas too a nqonaa fo nqeex.

¹¹Kaa nolaa xa oliiw na ƭing ake no soxodu we, a nduutaa o nirir biiñ ole too a mbeeraa fo a koɗom.

¹²Xa iin axe no we na nqonaa owe njibaa kam teeru ke, we ngaañeena a ƈufginooxaa, soo Roog a nuunufaanoox o njakad onqeene.

¹³A jega waa mbañna a qoolaand ale. Andee a ƭat a qoolaand too ndeefkiran.

¹⁴O baawar oxe kaa inooxaa lanq ƥutu, a war o ndool o ñaatu nqe, a ɓeedaa no yeng ole.

¹⁵O koor o seeseeq kaa cungaa a kid-a-caɓru, a layaa taa no yiif um ee: «O leng ga’kiraam», ndaa yaqanee ta muur mukit um.

¹⁶Guuɗ we kaa ngefaa pind ke o yeng ole, no ñaal ne, da mbegoox, yaam mbugee a qoolaand ale.

¹⁷Nqes den refu njaɓrand a kid, yaam kaa mer qufil ke no yeng ole.

¹⁸Kaa koy, kaa nu layaa yee: «O soxodu xe xan a maƥel nen o ƥaxañ o yelefu took poofi ke, lanq um a ngalakoox too xotkatee muk a ƭat ale no taxar biiñ ke ten.

¹⁹Ne lanq koɗome a yertaa foofi na teƥ a peraand, neene jaaniif a ɗuudtaa oxe na bakaadaa.

²⁰Ƭeen ke numnuuna xan a mbeecin, kusax ke a metooxin, too wetandooxkataand boo muk. O soxodu xe kaa luƈtel nen ndaxar,

²¹ten oxe toroxandoogna rew rimar we njegeerna o ƥiy, a xijlandaa ñaaw we.»

²²Ha’aa o mat! Fa doole um Roog kaa ɓaataa xa yeng no soxodu we, soo da ngeenoox nang, yaa da yaakaarateerna o ñoow.

²³Kaa ɗingaa a den, da njeg a koolax, a ref no gayaa a den na ƭat den.

²⁴A texeya, ndaa ndeer ñaf fo ƭeet ndefkatee meen, a yen, a nqon nen wiin we fop, a saxadel nen o yaƥ.

²⁵Ke layuuma jegu! An saɗaxam o maaɓin boog, a fi fa lay es yaq a ƥay o don?