Read NQAARIIT NE ROOG Yob 27 Bible Online

Yob 27 - NQAARIIT NE ROOG bible

Yob 27

¹Yob a xoxtahina a xoox um ee:

²Ne ta wooritna yee Roog fee xañtaxama wargal es oxe ñoowaa, ten o Cegu katil oxe mayƭandna kam es fo naqad,

³feek o ñis es ole wuuɗaa, Roog a haaƭnooraxam,

⁴neene a woortu yee o don es yaƥatkee njofaƭar, ɗelem es laykee xa maaƥ.

⁵Xalaatiim muk o coox a nuun ndigil, too boo yaa um ɗegkaa, kaam bugko xoxtaa o cofel es.

⁶Kaam geenoox no fañan a xoox es too sutooxkiim teen. Yiif es jambiraam naa moofum.

⁷Refee yee mi jagtu a las ale no soxodu xe, ndaa o pañ es, we na songaxam a njagit a las ale no cofaƭaru xe.

⁸Yaakaar num o kimeer oxe a yoqɗu, yaa o ñis um a dayna, yaa Roog a xuufna o ñoow um?

⁹Ndax Roog a naaga o nan-gilooxaa xa buuq um, yaa naqad a daluuna?

¹⁰Ndax no Cegu katil oxe o ɗaay um a refu? Ndax na Roog a jagnaa a qeƭ um mbanuu refna?

¹¹Xam jangin a nuun katil fee Roog, ɗasinkiim a nuun yuuƥ ke no Cegu katil oxe.

¹²Kaa koy, nuun fop nu andaan a paax. Xar na taxkaa boog nu sooboox na qalaat a cegee xoox?

¹³Keeke refu a las ale Roog a kesanna o soxodu xe, o roxanqol ole o Cegu katil oxe a geekanna o kiin fo’oy oxe:

¹⁴A jegangaa xa ƥiy xa mayu sax oo, xan laƥ a ñaam a den, soo xa taan axe ten a ñak ñaamel.

¹⁵We na ƥostooxkaa, xan a seel a war a den, too ñaaw we den ci’kaand o ƭomatoox a den[8].

¹⁶A fokatanooxangaa xaaliis boo jegee naa ta fi’uuna, a juum ñirax boo nen ngaƭ sax oo,

¹⁷a bug oo fokatin, ndaa o cofu xe na rokooxkan, oxe damooxna a lasel xaaliis feene.

¹⁸Kaa maxit mbind um nen o maxalaat, nen o ɗaakaand no yeeyetax.

¹⁹Kaa wondooxaa o siide, ta ref o ƭaan o palakaand um, a ɗeet a kid um, fop a mooc.

²⁰A qufil ake a mbetaan nen o jaɓ, a saaqul a maƥin ndeer o yeng.

²¹A qeñ ale no batand a adnaan, a ɓisin, a suqtitin doole me ta reeƭna.

²²A yena took um too yirmiran, ta jeemaa o god o joor, ndax ta woñin.

²³Kaa xaadnoortan xa pox, a wuuƴaa, yaa ta tañ-tañnan.