Read NQAARIIT NE ROOG Yob 28 Bible Online

Yob 28 - NQAARIIT NE ROOG bible

Yob 28

¹A jega maa xaaliis fee a xotteel, wurus fee a jeg maa ta siɗteel.

²Celem ke o mat kam lanq ke a mbaaƭteel, ɓil naayne le a wataa muus.

³Waawaq we kaa ƥisaa a qoolaand ɗuga lanq ke, a saakaa boo me o waag a dayna, a mbaaƭaa a ƥil ake kam o niɓaan ole.

⁴A kamb a mbaqe maa goƭna fo mbiñ ne ngeneena, maa o leng a reefkeerna. Maaga mat a njalaa, a yoorooraa xa ƥaak.

⁵Lanq ke andoona yee teen ñaamel a ngataa, yoora den kaa sufaaltel fiɗel.

⁶Kam a ƥil akeene o mat safiir a waaƭteel, soo wurus fee a hataa no kefatin ke den.

⁷A jega a ƭat alaa ndiiƭ ngiigif ne a andeerna, a canjiik ale mosiran o doon a ngid.

⁸Ƥaaɓaan soxodu ke mosiran o ndak, njogoy ne sax mosee o reef teen.

⁹Kaa koy, o kiin kaa gefaa ɓil ŋañ le, a jiqtaa xa coong axe boo na per ake den.

¹⁰Kaa waqaa a qul na ƥil akeene, too neene kalal ke no lanq ke a mbelakintiidaa a ngid no kiin.

¹¹Kaa suxaa a cur ake na mbaltaa na qul ake, kalal ƭasu ke, ta ɓisiid a den na qoolaand ale.

¹²Kaa koy, o and ole mat, mam a refu? Ndi taa ngenand ne no jeg-yiif ole?

¹³O kiin andee a ƭat ale, yaam refee muk no lanq ke no ñoow we.

¹⁴Qooƭ ke kaa lay ee: «Refee me in», juwaam fee yee «Refee me mi.»

¹⁵Waagaand o sofit wurus fa nqoolu, xaaliis waagiran o jik.

¹⁶Waagaand o dendandit sax fa wurus fee hatna Ofiir[9] mbaat ɓil jafeñu laa ne’eena onik mbaat safiir.

¹⁷Waagaand muk o fodrandit wurus mbaat o weer, o ƥaxañ wurus fa nqoolu waagiran o sof.

¹⁸Kooraay fo kiristal[10] ndefee tus paam um, o and ole moƴu jeg xa peme o njiriiñ.

¹⁹Waagaand o nandandit topaas fee Kuus, wurus fa nqoolu dendandkaand fo ten.

²⁰Yaaga koy, mam o and a inooru? Kaam ee taa ngenand ne no jeg-yiif ole?

²¹Kaa laqoox a kid no pindel ke fop, a ƭasnel tiiƭ ke na asamaan sax.

²²Yaq fee fo fa nqon fee kaa dee: «Kaa i nan doŋ ta layteel.»

²³Roog soom andu a ƭat ale no and ole, ten doŋ andu ngenand ne no jeg-yiif ole,

²⁴ten fee na ɗeetaa boo maa lanq ke a ndayna, a ga’aa fop ke refna ɗuga asamaan fee.

²⁵Ye ta hapanna nqeñ ne doole um, a fiis me poofi ke a mbarna o nday,

²⁶a dalnan a teƥ ale bargal, xa kiiñ axe fo ƭuuɗ ke, ta halan a den a ƭat,

²⁷maaga, a ga’a o and ole, a ɗeetlooxin, a horooxin soo a dalnin.

²⁸Cinj kaaga, a laya o kiin oxe yee: «O saɗar o Yaal oxe refu o and, goƭatir fo paaxeer a ref o jeg-yiif.»