Read NQAARIIT NE ROOG Yob 29 Bible Online

Yob 29 - NQAARIIT NE ROOG bible

Yob 29

¹Maaga, Yob a xoxtahina a xoox um ee:

²Cey, boo waag’uuma o nomtoox nen eetaand, nen ñaal ke Roog a saytooxoogaxama,

³ye o lampa le ten a kaƥaa yoora xoox es, a qoolaand um a ɗoxaxam kam o niɓaan ole!

⁴Boo waag’uuma o dakoox na doole es, ye Roog a saytooxaa mbind es,

⁵ye o Cegu katil oxe a maadna o refaa fa mi, soo xa ƥees xa koor a ndeeraam,

⁶ye a caf es a njootaa kam kagin ne, diwliin a caaroortaa no ɓil nolir le mi!

⁷Um retoogangaa na baayo faa, ndax um moof na seek es no nqel naa,

⁸xa pes axe waa nga’’axam, a ndiƈatoox, nogoy we a inoox, a ngeenoox.

⁹Kelfa ke kaa ƭegoogu jeetaay den, a ndam xa ton den.

¹⁰Wiin maak we kaa naagoogu cuxus, a maar xa ton den.

¹¹We nanoogaxama kaa layoogaam ee: «Ɗaayaa!», we nga’oogaxama, a seede’anaxam paax.

¹²Kaam mucloogu o ndool onqe ƴufginooxoogna fo o waan ole ñakna o ndimle.

¹³O toroxu xe kaa salanoogaam barke, o ñaaw oxe, um mayƭand xeeñ um fo o ɗaay.

¹⁴Kaam rokoox’u o cofel, ta ref ndoki es, a ƭat a ref sabadoor es fo tañalax es.

¹⁵Kaam reeƭu a ngid no puul oxe, ref a caf no ƥoof oxe.

¹⁶Kaam reeƭu faap no rool we, topatooxaa oxe andaandeena meen.

¹⁷Kaam gefoogu a kaaɓaaɓ no soxodu xe, suqtitaa no don um ke ta logna.

¹⁸Maaga, kaam xalaatoogu yee: «Xam xonit no mbind es, xa yeng es a mayit nen pep lanq ke,

¹⁹um ref nen ndaxar naa a paƴ um a ndaawaa foofi le, liim le a fe’aa na naaq um,

²⁰um gen no niweel, maadaa fa doole es kili nen a qali ŋaayne.»

²¹Kaa cungoogu um lay, a nan-gilooxaxam, a mbodandooxaa xa as axe mi.

²²A cinj fa lay es o leng doonoogee, too xa ƭelem es kaa mbel’u fop nen xa toq foofi took lanq beeru.

²³Kaa da cungoogaam ne a teƥ ale a cungteel, a tayaa fa lay es nen ngam.

²⁴Kaam muuƴooxanoogu a den, yaa da ñakna njambaar, a tagid a letu es a saƭakin a den.

²⁵Kaam adooxan’u a den, dalnaa ke wareena o fi, ref nen o maad ndeer a yaj um, yaalaa a den, yaa da ngooyna.