Read NQAARIIT NE ROOG Yob 30 Bible Online

Yob 30 - NQAARIIT NE ROOG bible

Yob 30

¹Ndiiki koy, kaam refat calat na xa koor xa teɓ axe, bug’eeruuma o fokat paap ke den fo xa ƥox axe mi, da yetooxaa ged es.

²Xar goor weene a njiriiñ’axam, den we njeg’ateerna o njembe?

³O ñak ole fo nqeex ne kaa ŋeesoogu a den, da mbaaƭaa kam o yeng ole kaa da ŋereñna no fo mbiñ fo ngenaand ne mbootna.

⁴Kaa ƥooroogu fo xuut ole paam fo mbafid ne, a ñaamaa a paƴ laar.

⁵Kaa ndaxoogel a ndeer no wiin we, a mbuuqeel nen o kuuɗ.

⁶Kaa ngenoogu kam a yulanq ake ngasooxna, no kamb cegee foofi ke fo no luf ke na ƥil ake.

⁷Kaa mbe’oogu na xa paa’uund a ndeer kol ke, a sondooraa ɗuga kiƈ ke.

⁸Kaa ndeyaƭar’u too limoor’aand, a sutel saax le.

⁹Ndiiki koy, mi xa ƥiy den a naxoortataa a kim, um refat calat den.

¹⁰Kaam wat a den xus, da ƈufaxam, too a nduxdaam na mukit ɗomee den.

¹¹Feek Roog kaa fudin a qali es, a neewandaam, a mbaagataxam o song fa doole.

¹²Ñaatu weene kaa inoox na ñamaak es, a tañ-tañnaa a caf es, a sexanaam a ƭat, ndax da saŋkaam.

¹³Kaa mbeg a ƭat es, a mbaaƭaa naa da yaqtaxama, too soxla’ee o ndimle’el.

¹⁴Kaa da mbadtiidaa me mi nen xiixire waa na ñoƴaa o gur o maak, a nqaañ no kefatin ke.

¹⁵A qufil ake kaa ndiidlandaxam, ngiin maak es a sooƴ nen kaa nqeñ a maƥna, o neq es a naag mendeng nen eel hurdooxu.

¹⁶Ndiiki koy, o laaw es oxe ɓutaa kam es, ñaal ke no coono ke a ndaawaam.

¹⁷No yeng ole, a ƭomaand ale kaa ɓuusaa xa kiiƈ es, ke na ŋeesaxam, ɓutee sen.

¹⁸Roog a naagaxam nuus no ndoki, a ɓoƭaam nen o cok ndoki fiiqu.

¹⁹Roog kaa deɓaam kam lopopooƈ le, um nandtataa fo ut fo ndaw.

²⁰Kaam ƴufginooxang, ndaa jaaɓkiraamo, um geenoox mbaambir of, o ɗeetaxam a ƭeet a ƥor.

²¹Kaa o ƴaxooxanaxam, ñagadilaxam fa doole of fop.

²²Kaa o yetnaxam took nqeñ ne, um sangaalooxin, a und ale a wirlaxam o mbiñ fo mbiñ.

²³Andaam koy ee na fa nqon o ɓisaxam, me ñoow we fop a nqetkaa.

²⁴Kaa koy, ndax oxe kefatin a yurdooxna took um naagee jeemaa o letin o ɓay um? Oxe refna na naqad, ndax naagee o ƴufginooxaa?

²⁵Ndax kaa loolanoogiim we o ñoow den a feƭarna? Ndax rool we kaa yuɗ’iraam?

²⁶Kaam cungoogu baneex, ndaa sabab garu, um yaakaaraa a qoolaand, o niɓaan a gar.

²⁷Naa gomrum fo coono kene, laaw ke mi kaa mbaƴaa, a mbañ o mbaas.

²⁸Kaam ñaaƴaa ɓalig ɗok, fop es a niɓaan. Kaam inooxaa a ndeer mbokatax ne, jax o faɗax.

²⁹Kaam refat o pog na xa ƥox-a-koƥ axe, o yoon na ba ake.

³⁰Ƭool ne mi kaa ɓalig ɗok, a xobdooxaa, cer es a ndoxaa yaam a sumaan.

³¹O nqilimb es kaa refat pakir a mboy, a liit es a fangnataa a ƭomatax.