Read NQAARIIT NE ROOG Yob 31 Bible Online

Yob 31 - NQAARIIT NE ROOG bible

Yob 31

¹Kaam xañit’u a kid es da ƭeet o toog boo a yuxmin.

²Um fi’’angiran, a las alum daawitkoogum na Roog fee took-ee-took? Kaam ee lam num o Cegu katil oxe na asamaan a lultiidkoogaxam?

³Kaa nu layaa yee: «O pi’kee jam oxe kaa daawaa paaxeer, o cofaƭaru xe a daaw o njakad?»

⁴Ndax a ƭat es a kunpa’a a Roog? Ndax naagee o limaa a taaraand es fop?

⁵Ndax kaam gen no maaɓaa juumaa, ƴiƴtaa wiin we, retaa?

⁶Fat Roog a meɗnoortaam o cofel, too xan a ga ee jegiim ƥanjel.

⁷A soƥangaa yee kaam ɗap a ƭat ale ta halanaxam mbaat xeeñ es a reef ke a kid es a yuxmaa mbaat paaxeer a roɗgin xa ƥay es,

⁸yaasam o lakas a muudoor duufe le mi, col ke mi fop a mbuurel!

⁹A soƥangaa yee o tew no kend es kaa ñaam xeeñ es, boo um xawlooxan no don-maax um,

¹⁰yaasam o tees a unan o koor o lakas, soo fop a ñaaƴnaa fo ten!

¹¹Kaaga a pi a cednooxu a refkoogu, tooñ naa wareena o maalit a qaw a ƭomu.

¹²Kaa refkoogu fiɗel laa na raaɓaa, a yaqaa fop, a sooyin fop ke lanq es a mbatna.

¹³A soƥangaa yee kaam dak ndigil surga es mbaat o ceefeer es, yaa da layooriidna fa mi,

¹⁴xar um fi’kaa, yaa Roog a inooxkaa? A laamtangaam, xar um doonkan?

¹⁵Ndax oxe moolaxama no fud ya es moolee a den, den oo? Ndax Roog fa leng kut fee bindee a in no laaw ya in?

¹⁶Ndax mosaam o xañ o neewu doole xe mbaat um gef yaakaar no ñaaw oxe?

¹⁷Ndax mosaam o ñaam, xaƴ o waan ole?

¹⁸Naa moofum kaam fesooraa fo xa baan axe nen a faap den, too naa rimeem kaam taatnaa ñaaw we.

¹⁹Ndax mosaam o fañ o ñir oxe ɓangdeena mbaat um xaƴ o ndool onqe jegeerna kulooxel?

²⁰Ndax cer um ngidmiraam, yaam ne hultuuma a den pay mbi’te a ƥiñ ake no paal ke mi?

²¹Ndax mosaam o ɗaayan o waan o kamax took o and ee xan haahate we fop a ndaktaam a caf?

²²A soƥangaa yee keene a jega, yaasam a naax es a fastoor na kand ale, o ɓay es a leƈtoor no noonoong ole!

²³Yaaga saɗarkoogaam a qaw ale Roog, too waagkoogiim o xox mbaambir o magnel ole ten.

²⁴Ndax kaam ɗag yaakaar es na wurus fee, layin ee: «Wo hoolooxum?»

²⁵Ndax o ɗaay es a reeƭa na halal fa maak fee mi, no tig oo tig ke jeg’uuma fop?

²⁶Ndax um ga’’angaa njeeƈ ne a miric-miricnaa, mbaat a qoor ale a meleƈaa,

²⁷xeeñ es a fogooge na pet, boo um jataa na den?

²⁸A soƥangaa yee fi’aam keene, haahate we a mbaraxam o nqaw, yaam kaam xañkoogu a Roog fee took-ee-took.

²⁹Ndax mosaam o felakinoox no paaxeer kaa ndalna o pañ es, ndi kaam mos o sawar yaam sabab a song o log um?

³⁰Mosiim o xaƴ ɗelem es ta bakaad, mbaat um salantin o kiin fa nqon.

³¹Ndax wiin mbind es layoogee yee: «An ñaameeru boo a naag tem na tegeƴ ake ten?»

³²O kenar es mosee fe tafil, o don-maax es, um wetanan ñaañaaƴ we.

³³Ndax naagaam o ɗasnaa pakaad es nen lakas we, tooñ es, um migin a den kam es?

³⁴Ndax mosaam o saɗaraa laalay we no mbed onqe, diidaa o xeefel, boo a taxaa um maar o don es, wegoox no mbind es?

³⁵Cey! A jeg’angaa rek oxaa nan-gilooxaxama! Waagaam o daaɓoox ee ke layuuma fop ndigil oo. Fat o Cegu katil oxe a doonaam! Yaaga koy, taa a kayit ale saqna ke o pañ es a jambaxam?

³⁶Um ga’angaan, ndax gadooxkinum? Kaam ee ndax roxondooxkinum nen o ndip?

³⁷Daaraand luu fi’uuma, wetandooxkoogaanum a Roog, sawar o geenoox mbaambir um nen o kelwaar.

³⁸Ndax lanq es a mosaxam o looloox, ndi xa yas axe ten kaa mos o yuurnaa xa kooniit?

³⁹Ndax kaam saxadan o ƥor o ƥor too doskinum?

⁴⁰A soƥangaa yee neene yoo, yaasam lanq es a saxik qooc ee bele, a saxik ɗaay ee lorso. Meeke fa lay fee Yob a xoxtitna a xoox um a dayu.