Read NQAARIIT NE ROOG Yob 33 Bible Online

Yob 33 - NQAARIIT NE ROOG bible

Yob 33

¹Ndiiki koy, wo Yob, nan-gilooxi ke um layang, rung nof of na xa ƭelem es fop.

²Me ta refna koy, xam yaƥat o don es, ɗelem es a woktoox,

³um layong booru, yegnong ndigil kak ne.

⁴Yiif le Roog sakaxam, haaƭ le no Cegu katil oxe a ci’aam o ñoow.

⁵A soƥangaa yee waagaano, doonaam, fapoox, ndax o xoxit a xoox of.

⁶Mi fa wo mbodu mbaambir Roog, no ƭok hatum nen a wo.

⁷Ba o jeg boog kaa o saɗaraa na mi mbaat o xalaataa yee xam moxoñong.

⁸Kaa koy, layaa no nof es, too nanaam ke layoona yee:

⁹«Mi, kaam xool qac, ñak bakaad, jof pec, too tooñ leng refee na mi.

¹⁰Kaa koy, Roog kaa waaƭaa kaa ta xawtaxama, a ɗeetaam nen o pañ um.

¹¹Kaa saarnaam, a gayaa fop ke um fi’aa.»

¹²Xam doonong no keene yee layiro ndigil, yaam Roog hupu o kiin.

¹³Xar taxu o bug o layoor fo ten, yaam ne ta dooneeroonga?

¹⁴Yaag oo toox de, leek-leek Roog kaa laytaa neeke, leek-leek ta layit naana, ndaa i naangiran o ngorooxaa.

¹⁵Kaa laytaa no ƭaaɗ fo no yeeyeng, a soƥ wiin we a naang hanq, a ƭaanaa no cong den.

¹⁶Maaga, a naaga o lalaa wiin we peeñax, a saɗarnoortaa a den a maƭax um,

¹⁷ndax ta xaaj o kiin fo a pi a paaxeer um, a fi boo yenkee na magnandax.

¹⁸Neene, xan a muclin no gamb le na saŋkax ale, a guutatirand o ñis um fo fa nqon fee.

¹⁹Roog kaa raagoortaa o kiin oxe jir laa na wondnan no njong um, cer um fop a ƭomaa.

²⁰Maaga, xan ñaamel a mbatin xus, a refangaa ke ta moƴna o bug sax oo.

²¹Cer ke ten kaa mbagaa tak, bo ta yoqat xa kiiƈ xa ƥor.

²²Ñoot um kaa fagiidaa, ta ƴookataa xon we.

²³Kaa koy, a soƥangaa yee a jega malaaka faa na xeɗooxanan, a refangaa fa leng kut a ndeer malaaka cuni-cuni sax, soo a yegin o kiin oxe ke ta helna o fi,

²⁴xan a yirmin soo a lay a Roog ee: «Wateen, ndax rokkee no gamb le na saŋkax ale, yaam jegaam pexey naa wattanuuma.»

²⁵Maaga, xan cer ke ten a njegatin doole, ta dakoox o ndeɓandoong.

²⁶A xeɗangaa a Roog, xan a jaaɓin. Xan a faɗooxan fo xa ƈeel, yaam ne Roog a daknuuna no sagu um.

²⁷Maaga, xan a xaan mbaambir no fop ee: «Bakaad’aam, ɗap a ƭat ale, ndaa Roog dooniraam ke helna na mi.

²⁸Roog kaa wat o laaw es boo retee no gamb le na saŋkax ale, o ñoow es a jegatin a qoolaand.»

²⁹Keene refu ke Roog a fi’anaa o kiin a caf a mayu,

³⁰ndax ta suudit o laaw um no gamb le na saŋkax ale soo a ci’in a qoolaand o ñoow.

³¹Wo Yob, rungi nof of, nan-gilooxaam, naag miik, soo mi um lay.

³²A soƥangaa yee jegaa xa ƭelem axaa doonoona, layi a den, yaam sawarkoogaam no cooxong ɓur.

³³O jegangee dara kaa layoona koy, naagi cuxus, nan-gilooxaam, soo um ɓaatong o and.