Read NQAARIIT NE ROOG Yob 34 Bible Online

Yob 34 - NQAARIIT NE ROOG bible

Yob 34

¹Elihu a suuratina fa lay um ee:

²Nuun yaal-o-and we, nan-gilooxyo fa lay es! Nuun we njegna yiif, ndungyo nof nuun!

³Nof na jaqtirandaa fa lay, o ɗanqarlam a anddirandaa a safaand ñaamel.

⁴Fat i ƥaal boog ke jofna, njaqtirand a ndeer in ke faaxna.

⁵Yob kaa tee: «Mi ɓuru, ndaa yaqanee Roog a xañaam wargal es.

⁶Ndigil kak layum, soo fi’el o maamaaɓ. Jir le mi kaa ɗom lool, too bakaadiim.»

⁷Ndax a jega o kiin oxaa nandna fa Yob, fodandna o xaadnoox a Roog fo yer foofi?

⁸Kaa xaariitoor fo fiifi paaxeer we, a yoonaa fo soxodu we,

⁹yaam kaa layaa yee: «Jeemaa fel a Roog jiriiñee tus.»

¹⁰Nuun yaal-o-and we, nan-gilooxaamoo boog! Saɗaand o lay muk ee Roog kaa fi’aa paaxeer, njofaƭar leng refee no Cegu katil oxe!

¹¹Kaa rabdaa o kiin oo kiin a pi um, a ɓoxotaa oxuu refna a pesoorooƭ um.

¹²No ndigil Roog naagee fi’aa paaxeer, o Cegu katil oxe naagee sufaalaa o cofel ole!

¹³An gadnun ta maadoox lanq ke? Ndi an doxnun a topatax ale na adna fee fop?

¹⁴Boo ta xalaatoogna a xoox um soom, a suud teen haaƭ um le na ñoownaa,

¹⁵kuu na ñoowaa a saŋkooxkooga ndak fo ndak, soo o kiin oxe a nomtoox no lanq ke.

¹⁶A soƥangaa yee jegaa yiif, nan-gilooxi kene, rung nof of no fangax le na fa lay es.

¹⁷Ndax oxaa sibna o cofel ole a waagkooga o maadoox? Nam saɗto o maal o Cegu katil oxe jofna,

¹⁸ten fee na layaa o maad oxe yee: «Jariro tus!», o kelwaar oxe, ta layin ee: «Wo soo hañaan!»?

¹⁹Naagee o fartaa wiin maak we, jegee njektirand ndeer o yaal halal oxe fo o ndool onqe, yaam den fop kaa ndef jale na xa ƥay um.

²⁰Ndeer ñaf fo ƭeet xan a ñak xa ñis den kam o yeng ole. Qeet ke kaa yo’neel soo a mooc, oxe jegna doole a ineel meen no yooɓu.

²¹Roog kaa gayaa a pesoorooƭ no kiin, a doon a kid um muu ta dakaa.

²²Jegee o niɓaan, a sisaaƥ ne’aand, maa we na mbi’aa njofaƭar a mbaagna o ƭas.

²³Roog soxla’ee o dalnaa waxtu faa ta layoorna fo o kiin.

²⁴Kaa duguñaa wiin maak we too soxla’ee laamit, a doonaa lakas na seek den,

²⁵yaam a anda xil a pi den. Kaa jiƭtaa a den o yeng soo a duguñ a den.

²⁶Kaa xawaa a den na kid no fop, nen wiin faaxeer we,

²⁷yaam ne da mbesuuna a cinj, a mbañ o ndeef ke ta dalnanna a den fop.

²⁸Den taxu o neewu doole xe fo o toroxu xe a ƈufginooxaa a Roog, too kaa nanaa xa buuq den.

²⁹A damangaa njaambuur um, an saɗun o xasan? A ɗasnangaa mukit um, an na waagkan o ga? Kaa gayaa qeet ke fo wiin we,

³⁰ndax o soxodu xe maadooxkee too refkee a panq na xeet fee.

³¹Ndax o kiin a layangaa a Roog ee: «Gadooxaam a qaw es, ndaa bakaadkatiim.

³²Lalaam tooñ es ke ga’eeruuma. A soƥangaa yee kaam fi njofaƭar, fi’katinum.»

³³Ndax na wo xan Roog a hate’in? Feek wo na felaatooraa fo ten, wo na laykaa ke xalaatoona teen, ndaa refee mi.

³⁴Wiin we njegna yiif mi a yoontu, o yaal-o-and oxuu nan-gilooxaxama a xalaatit nen a mi yee:

³⁵«Yob andee ke ta layaa, ke ta ratataa juumaa a ñak-xoox.

³⁶Fat a ref no ɗeetlooxeel rek, feek nen jofaƭaru we a bugko laytaa.

³⁷Kaa ɓaataa no tooñ ke ten siiknoor, a xaadnooxaa a Roog a ndeer in, a ratataa juumaa took gon le ten.»