Read NQAARIIT NE ROOG Yob 35 Bible Online

Yob 35 - NQAARIIT NE ROOG bible

Yob 35

¹Elihu a suuratina fa lay um ee:

²Foogaa moos ee waagaa o lay ee: «Ɓuraam a Roog»

³mbaat o layin ee: «Xar o ñak o bakaad es a jiriiñong, ndi xar a ɗaxaxam?»

⁴Mi na doonkang, wo fo qaariit of fop.

⁵Horooxi asamaan fee boo ga! Ɗeetangi ne a eel ake a ngartitoonga took!

⁶O bakaadangaa, xar a wañkan? Tooñ of a naangangaa gañ sax, a ƭat um yongee teen.

⁷A soƥangaa yee jofaa, xar a ɗaxkan? Xar a daawitkaa na wo?

⁸Kañaan ne wo de, o kiin nen a wo doŋ a waaganu tig. O cofel of o mbindeef soom a jeganu o njiriiñ.

⁹Faan le no ñaañagadil we kaa loolooxeel, a ƭom-yedar ale no jaaku a ɗomatooxeel.

¹⁰Kaa koy, o leng layee yee: «Taa Roog fee sakaxama, ten fee na gimnooraa o kiin a kim a niwir kam o yeng ole,

¹¹ten fee na aqataa a in na pexey muumeen ke no lanq ke, a ci’aa a in o and na pexey tiiƭ ke na asamaan?»

¹²Kaa ƈufginooxaa, ndaa Roog jaaɓee a den yaam a magnandax den fo coxod den.

¹³Kaa mbalalooxaa na xa koɓong. Roog jaaɓkee a den, a ƭat no Cegu katil oxe yongee teen.

¹⁴Nam a doonitkang, wo fee layna yee ga’ino too doon mbir of mbaambir um ref no cungan?

¹⁵Kaa o lay ee Roog naagee o xawaa, too a ƭat um yongee na bakaad.

¹⁶Kaa o yaqaa a ƥay o don of, ratataa juumaa, too andiro ke o layaa.