Read NQAARIIT NE ROOG Yob 36 Bible Online

Yob 36 - NQAARIIT NE ROOG bible

Yob 36

¹Elihu a suuratina fa lay um ee:

²Cungi o ndik, um andnoorahinong, yaam maadaam o yoqɗaa kaa xoxtituuma a Roog.

³Xam xotit o and es koƭu soo ɓoxot oxe sakaxama ɓur.

⁴Fa lay es kaa saƭik koŋ, too yaal-o-and o xoolu na layaa fa wo.

⁵Roog a jega katil, naagee deɓaa o leng. O jeg-yiif um jegee hap.

⁶Naagee o xaƴaa o soxodu xe ta ñoow, o toroxu xe, ta ɓoxotin ɓur.

⁷A kid um kaa ngaanaa took no jofu we, ta moofin a den took uum nen maad, a dalin a den teen boo kili, ndax da yoɗel.

⁸A jegangaa waa njengeena, a ñaataa kam kaso den,

⁹o and ee Roog kaa weejlaa a den pakaad den fo a magnandax den.

¹⁰Kaa xaƴnooraa a yiif den na maƭax um, a sim a den da mbes njofaƭar den a cinj.

¹¹A nan-gilooxangaa soo a nanan, xan a muukit xa yeng den baneex, a paangit xa kiid den kam o ɗaay.

¹²A nan-gilooxangee koy, xan laƥ a ñaam a den, da nqonaa took o ñak-o-and.

¹³Gimaƭaru we o mat kaa ndamaa fuux den. Naangee o ƈufginooxaa a Roog, yaa ta jengna a den sax.

¹⁴O ñoow den kaa xuufeel, yaa da mbodna na doole den, da nqontaa nen a caga koor ake[11].

¹⁵Kaa koy, Roog kaa muclitaa o toroxu xe o ñaat um, a xaƴnooraa yiif um na maƭax um na pexey coono ke.

¹⁶Wo itam, Roog a suudit’aang na naqad, a ɓekong no yaadax, o roon of a may fo ñaamel pelu.

¹⁷Ndiiki koy, a qaw ale no soxodu we a dalaang, o daawaa ndabid a pi of.

¹⁸Ngela baa fuux a ɓekong no xaadnoox a Roog, too baa o magnel ole no ndabid a pi of a ɗapnoorong.

¹⁹Ndax xa buuq axe wo a mbaagaang o sut na naqad, mbaat doole of fop sax?

²⁰Ba o yaakaar o yeng ole na inaa meen qeet ke.

²¹Damooxi boo baa o rok no paaxeer, yaam paaxeer ke fi’’oona ngaru fo coono of.

²²Ga’angi ne katil ne Roog a magnitna! An waagu aqatinit nen o ten?

²³An fiisanun a ƭat ake ten? An saɗun o lay ee: «Fi’aa paaxeer»?

²⁴Ba o weec o simat a pi ake ten, o mbindeef onquu refna a xaanaa.

²⁵Oxuu refna kaa fuudaa a den, ke da ƈookeel a ƈook fop oo.

²⁶Roog kaa magin boo i andee ne ta fodna, too xa kiid um mbaagaand o lim.

²⁷Ten na qicaa poofi ke took, a siɗ pand ke na asamaan, a fi a den a teƥ,

²⁸a eel ake a yuurniidin, a yoosin took wiin we fop.

²⁹An andu ne a eel ake a ñaaƴtaa, ne ƭuuɗ a fangoortaa na asamaan fee?

³⁰Kaa ɓalañnaa xa kiiñaand um me widuuna, qooƭ ke no maag ole, ta muur a den.

³¹Kaa ñoownitaa qeet ke a teƥ ale, a ci’aa a den ñaamel bo ta dey sik.

³²Kaa pokooxaa o hiiñaand, a joorin me ta bugna.

³³Ƭuuɗ na yegnitaa a kar um, xa siir axe sax a yeg ee a matiida.