Read NQAARIIT NE ROOG Yob 37 Bible Online

Yob 37 - NQAARIIT NE ROOG bible

Yob 37

¹Um nanangaa ƭuuɗ ne Roog, kaam sendaa ne fodeema fop, o laaw es a ret.

²Nan-gilooxyo! Kaam ee nu nan-giloox fangax le no ñuxur um, gur-gur le na sutooraa no don um!

³Kaa ɓalañnaa o hiiñaand um muu refna ɗuga asamaan fee, ta meleƈaa boo me lanq ke a ndayna.

⁴Cinj kaaga fangax a jib, ta ɗuuɗ fo o ñuxur ole ten jegna doole, o ñuxur ole ten oxaa jibaa rek, xa kiiñaand a yoon fo ten.

⁵Roog kaa ɗuuɗaa fo o ñuxur ole ten naa jom’anditna. Kaa fi’aa tig maak kaa i andeerna.

⁶Kaa layaa nees fee yee: «Yenki a lanq!», a layin a teƥ ale boo no puyaam cegu doole ke.

⁷Kaa ɓolaa coxla no wiin we, ndax fop a andid ke ta fi’aa.

⁸Puufuɗag ke kaa ndokaa no luf ke soo a mbondoox no qanq den.

⁹A und a maak no ɓemb-roog o ñamaak a inooraa, a cogoñ a inooraa no ɓemb-roog o janoon.

¹⁰Roog kaa wuuɗaa, poofi ke a suptoox galaas, took fee na banj ake a naag kaŋ a saƭik.

¹¹Roog kaa soɗaa a eel ake a quƥaand, soo a picit a den muu refna, a yoonandtin xa kiiñaand.

¹²Kaa ñaaƴnitaa a den ne ta bugitna, ndax da mbadin fop ke ta hebilna a den took lanq ke.

¹³Roog kaa hebliidaa a teƥ ale took lanq ke, a xawtan wiin we mbaat ta yirmitin a den.

¹⁴Wo Yob, nan-gilooxi kene! Xori o ndik, ndax o ɗeetaqin com’andtu ke Roog.

¹⁵Ndax andaa ne Roog a ñaaƴnitaa a eel ake, a ɓalañnitaa teen xa kiiñaand axe?

¹⁶Ndax andaa ne a eel ake a yettaa, com’andtu keene no xe andna fop?

¹⁷Woxe ñirax of a taƥna no cer of, yaa a ƥay ale a naagna tek yaa fo mbooyo ne,

¹⁸ndax waagkoogaa o dimle a Roog, yaa ta xawna asamaan fee, boo ta saƭkit nen o ɗeendoor o ɓodaxne?

¹⁹Andnoorangi a in ke i mbarna o lay a Roog. In de, kaa i ndef no niɓaan, ten taxu i mbaagee o ndoon dara.

²⁰Ndax o yegnin ee kaam bug o lay a woora ndi boog, xan a yegnel ee o kiin a laya?

²¹Ndiiki koy, a qoolaand ale kaa mo’aa, a eel ake a laqin, cinj kaaga, nqeñ ne xaa yoɗooxaa rek, a seeƭ a den.

²²No ɓemb-roog o janoon a qoolaand alaa saxitna nen wurus a inooraa. Cey, ndaw ne o magnel ole Roog a saɗarnooxitna!

²³O leng waagee fad me no Cegu katil oxe. Kaa magin na doole, no cofel fo na ƭat, too soxla’ee o doon o leng!

²⁴Ten taxu wiin we a mbaraan o saɗar. A kid um ngaanee no we na mbi’ooxaa yaal o and.