Read NQAARIIT NE ROOG Yob 38 Bible Online

Yob 38 - NQAARIIT NE ROOG bible

Yob 38

¹Maaga, o Yaal oxe a doonta a Yob ndeer a und alaa yee:

²Ndi an oo xene na sufaaltaa yuuƥ ke mi fa lay fa andand?

³Maaƭooxi too ref o koor! Xam laamtong, o doonaam.

⁴Mam reeƭo, ye um feraa lanq ke? O and of a daawangaan, layeen.

⁵Ndax andaa oxe liiƥuuna? Ndi an letnu took um o ƥaak o liiƥir?

⁶Na xar a toodook ake ten a ngasne? Ndi an doonu ɓil faraaj le ten,

⁷ye xa qoor-mbeet axe a tapoorna, a mbelakinooxaa, malaaka ke Roog fop a njibnaa xa ƈeel?

⁸An naagu poofi ke na juwaam fee rap fo begax, ye ta sutoortiidna no qooƭ ke a siliidaa?

⁹Mee ndax mi yoo, mi fee rokanuuna eel soo foftin o niɓaan ole.

¹⁰Kaam dalnanin bargal soo sipanin begax fo a kinglir.

¹¹layin ee: «Xan o gar boo mene, ndaa jolkino. Meeke a yaand ake wo a ndaykaa.»

¹²No ñoow o ñis of fop, ndax mosaa o hebil njeeƈ ne ta wat? Ndax mosaa o andnoor mbeet ne a seek um,

¹³ndax ta dam no cat ke no lanq ke, soo a yirif soxodu we?

¹⁴Boo ta feedaa fop kaa suptooxaa nen ƭok toxe, soo a refat nen kaa rokeena ndoki yaxgu.

¹⁵Soxodu we kaa nqaajeel fo o niɓaan ole refna a qoolaand den, balu-balu den fop a fag.

¹⁶Ndax mosaa o fad me o maag ole a maynitaa? Ndax mosaa o foƭit a caf of boo no duf le na juwaam fee?

¹⁷Ndax feeñlee xa ton-maax axe jaaniif, begax ke na fa nqon fee?

¹⁸Nam foogo foog moos ee neen lanq ke a yaajtu? A soƥangaa yee andaa keene fop, layeen.

¹⁹Taa a ƭat ale na ɓisaa no ngenand ne na qoolaand ale? O niɓaan ole mat, mam a faqaqooru?

²⁰Ndax wo na xotkaa a den, ɓis a den no calel den, soo andnoor a den a ƭat ale na ɓisaa no kenand den?

²¹Andaano, feek a soƥa o rimel, yaam xuuɗaa o ñis lool!

²²Ndax fadaa boo me nees fee a geekeena? Ndax ga’aa ngeek ne na kalam a ƥuuɓu ke?

²³Kaam hend a den yaam camaane ke na naqad fee, yaam ñaal ke na ñoq ale fa xire fee.

²⁴Taa a ƭat ale me um pasartaa xa kiiñaand axe? Mam nqeñ ne no batand a wuuɗtiidaa took lanq ke?

²⁵An fiisanu mbuyaam ne a ƭat? An halanu ƭuuɗ ne a qal um?

²⁶An na deɓanaa lanq kaa ngenaandeena, a koƥ-a-ƥor alaa o leng a geneerna,

²⁷ndax ta yerin fo mbiñ ne mbootna too a naang hundang soo a saxin teen daaƭ?

²⁸An refu faap na teƥ ale? An na rimnooraa toq a liim?

²⁹Galaas fee o mat, an rimun? An ñootu liim ŋaaɗu le na hataa na asamaan?

³⁰Poofi ke kaa naangaa jiŋ o mbiñ o leng nen ɓil, took fee na juwaam fee a ŋaaɗ.

³¹Ndax waagaa o hiɓ juq le na xa Kulook axe mbaat o wokit o ƥaak ole yuuɓna Ndaalaand ne?

³²Ndax naagaa feeñlaa xa qoor xa ƭeetir na waxtu den, gayaa fa Ñiig fee fo o ƥeem?

³³Ndax andaa ne tig oo tig ke a ñaaƴtaa na asamaan? Ndax wo na fadnaa took lanq ke ke bindeena teen?

³⁴Ndax waagaa falaloox a karinj ake, boo mbuyaam a yen took of?

³⁵Ndax mosaa hebil xa kiiñ axe boo da ndet, ndi a mosaang o lay ee: «In wey»?

³⁶An andnooru a eel ake ne da mbarna o ndeɓtaa, a ci a karinj ake yiif laa da caartaa foofi?

³⁷An jegu o and olaa ta limitna a eel ake soo a rungiid pand ke na asamaan,

³⁸yaa lanq ke a saƭkatna nen njelem, a ƭiisoor, a mbi a ƭak kam xa qol axe?

³⁹Ndax wo na xawlooxanaa njogoy ndew ne, giñnooraa fo njogoy fo njanglax ne,

⁴⁰yaa da sakalna kam qanq den, a ƭas kam muƥ le no kol ke?

⁴¹An na cooxaa a tooq ale ñaamel, yaa xa ñeek axe ten a ƈufginooxaa a Roog, a njoqooyooxaa yaam nqeex?