Read NQAARIIT NE ROOG Yob 39 Bible Online

Yob 39 - NQAARIIT NE ROOG bible

Yob 39

¹Ndax andaa waxtu fee pambe-koƥ ke a ndimaa? Ndax mosaa ga njaf, yaa ta ñootaa?

²Ndax andaa a qool a podne da mbudaa, dam waxtu fee da ndimkaa?

³Tew ke kaa sakalaa soo a ndim, a ƭomaand ale den a wat.

⁴Fo mbote ne den owaay njegaa doole soo a maak na xa saawit axe, a naanga o ndetanaa a qoox den too nomtooxiidkatee me no yaay ke.

⁵An xaƴu o faam-a-koƥ ole ta jeg a xoox um? An guutatirandun fo kadoor?

⁶Kaam fi ta gen no tan ole, a ñoowaa no lanq cemu.

⁷Kaa jalaa coow le na teeru fee too nankee o ñuxur no yaal a sareet.

⁸Took xa coong axe a suufaa, a waaƭaa teen kuu na xuƥaa.

⁹Ndax naak-a-koƥ le a jaɓa jalanong? Ndax xan o fe’nin no kud?

¹⁰Ndax waagaano humin, xooxtikin o qol of? Ndax xan a reefanong, a jiqtaa lanq kam a yulanq ale?

¹¹Ndax xan o hoolooxin, yaam ne ta mayna doole? Ndax xan o xaƴin fo ke waroona o jal?

¹²Ndax xan o ɗag no ten yaakaar of, ta ruuñiid saxade of? Foogaa moos ee xan o fokattiidin a kusax of no cukand ne?

¹³A ba ale kaa letnaa a nafir um fo o ɗaay, ndaa a naf ake ten laabiirtee nen a naf a keel.

¹⁴A ba ale kaa ɓoofaa a lanq, a xaƴ a den maaga, a sumaan ale a ɓop a den.

¹⁵Naagee xalaataa yee o jaf a waaga o dak a den, ƥaaɓaan a waag o gef a den.

¹⁶Kaa soxod na xa ƥeem wee ndax rimee a den, o xij na tus haaliran.

¹⁷Roog ci’iran a ci o and, lasiran o jeg-yiif.

¹⁸Kaa koy, a inooxangaa, a waasloox, kaa jalaa pis fo o ŋaaŋaay um.

¹⁹Ndax wo ci’u pis ne doole soo dufanin jibaq no cok ole ten?

²⁰Ndax wo na foolnan nen soƈ? Ŋexel felnooxu le ten kaa saɗarnoox.

²¹Kaa gasdilooxaa na yulanq ale, a sawar na doole um, a waaslooxan a ñoq ale.

²²Kaa jalaa caƭar ne too naagee o diidaa. A jasnoorangaa fo laƥ ne sax, nomtooxkee o jiijing.

²³Fangax le na kas ake kam a tungaar ale kaa njaaƥatilooxaa took um, a salma ke fo a sakoor ake a meleƈaa no njeeƈ ne.

²⁴A naaga o dañaa yaam a tay, a ƴaxaa a ƭat ale. A luuƥ xire xaa jibaa rek, waagkatee o dam a xoox um.

²⁵A luuƥ ale a jibangaa, kaa ŋexelaa. Kaa fodaa koƭu, a duñnooxaa a ñoq ale, xa buuq axe no aa-adax we fo combol le.

²⁶Ndax wo jangnu a tunj ale a yet, ta letin a nafir um farna fo ɓemb-roog o ñamaak ndax ta bofoox?

²⁷Ndax wo na heblaa a tud ale ta yoɗoox soo a fi ndaang um took-ee-took?

²⁸Kam xa coong xa koƭu took axe a genu, a fe’aa maaga, xa luut axe na xa coong axe a ndef saŋe um.

²⁹Maaga fodaa, a ƴooklooxaa kaa ta ñaamna, a kid ake ten a ƈookaa koƭu.

³⁰Xa ñeek axe ten kaa yeraa fo’oy, too me xa tal axe a luuñaa, maaga a refaa.