Read NQAARIIT NE ROOG Yob 4 Bible Online

Yob 4 - NQAARIIT NE ROOG bible

Yob 4

¹Elifaas fee genna Temaan a janga fa lay faa yee:

²Um layangaa, mbaa fuuxkiro? Kaa koy, an waagun o tiimit?

³Yooɓ’aa o asaa lakas we, dimle’aa we neewna doole.

⁴Fa lay of a inatina oxe tolofna, o saƭkand kuɓay no xe na tiipaa.

⁵Ndiiki koy fee ta refna wo, foosaa, ndiiki xe ta daloonga, jaqaa!

⁶Ndax ne saɗaroona a Roog refee ndamlooxand of? Ndax yaakaar of refee no ñak soqel of?

⁷Xalaati no yiif of: Ndax mosaa ga a jaambuur faa saŋkooxna, mbaat jofu waa moocandeena?

⁸Mi koy, ga’aam ee: We na nduufaa njofaƭar, a nqooxaa paaxeer, xa tim den a saxadaa.

⁹Ñoot ne Roog kaa saŋkaa a den, a qeñ ale no fuux um a maƥ a den.

¹⁰Soxodu we kaa mbumbaa nen cogoy, ndaa xan Roog a tiimin a den, a gaak a ñiiñ ake den.

¹¹Njogoy ney a saŋkooxaa, yaam a ñak kaa ta lisitna, soo xa ƥeem a pasaroox.

¹²A jega fa lay faa nof es a ngifna, soo um nanaqilooxin.

¹³Kaa gar na mi nen o ƭaaɗ o paaxeer kam o yeng ole, a soƥ fop a naang hanq a ƭaanaa.

¹⁴Caƭar fo diid a ndamaxam, soo cer es fop a sendaa.

¹⁵A ƥay a faɗaxam na mukit, soo wiil es fop a ñaaƴ.

¹⁶Ga’aqilooxam tig mbaambir es, ndaa and’iim ke ta reeƭna, o mem oleene a naaga fa mi jak, fop ee yereng, soo um nan o ñuxur olaa layaxama yee:

¹⁷«Ndax o kiin a waaga jof mbaambir Roog? Ndax o mbindeef a waaga xool mbaambir no Saasak um?

¹⁸Roog hoolooxee sax malaaka ke ten, a ga’a soqel no dag we ten.

¹⁹Nam a hoolooritkaa o kiin oxe refna mbind maxte ƭok, a hat no fo ut ole, a waagel o tuc nen o ngusax?

²⁰O kiin kaa neqaa no nqes ne, boo roog a yaaraa ta mooc, too a ƭat no leng yongkee teen.

²¹O ƥaak ole no ñoow um kaa ɗegaa ƭukit, ta xon too andee ke garna fo ten.»