Read NQAARIIT NE ROOG Yob 41 Bible Online

Yob 41 - NQAARIIT NE ROOG bible

Yob 41

¹O ga’afulangee a Niŋki-naŋka, waagaa fakooxaa, ndaa oxaay wiirandooxaa, o laaw of a ret.

²O leng jegee njambaar naa ta cuqtuuna. Yaaga boog, an waagaxam o xox sup?

³An fi’anaxam tig boo um helkan o rabid? Mi jegu fop ke refna ɗuga asamaan fee.

⁴Xam layit itam cer ke ten, layit doole um fo o mosel ole no mem um.

⁵Ndi an na hulitkaa ndoki um, a xuuy ƭool ndinqu ne ten?

⁶An waagu yaƥatin o don ole ten saqna a ñiiñ a saɗarnooxu?

⁷Pegoor kaa mbi’na a cur a mayu muuru ndiiñ ne ten, a ƭiisoor, a saƭik koŋ.

⁸Nuu refna kaa ɗiisoor fo ngend um, boo nqeñ sax xeƈee a ndeer den.

⁹Nuu refna kaa taƥir fo lakas ne, da saaƭoor too mbaagee o saƭtoor.

¹⁰Oxaa disooxaa rek koy, a qoolaand a ƥalañ, a kid um a nand nen njeeƈ naa na wataa.

¹¹A laalaam fiɗel na sutooraa no don um, xa meldaand a mbiltaa teen.

¹²Xa ñis axe ten kaa mbataa fo suun nen ndeen naa na suunaa, nen boob laa na doxeel.

¹³Haaƭ um kaa heƥandaa a kaagaañ, fiɗel a sutooraa no don um.

¹⁴Doole um kaa ref no cok ole ten, too muu ta juuxna, diid a ref maaga.

¹⁵Ke mokna no cer um sax kaa saƭik koŋ, a ref nen njelem njawe naa waagaandeena o suurin.

¹⁶Xeeñ um kaa naag koŋ nen gac, a saƭik nen ɓil[13] unir le na refaa ɗuga fee.

¹⁷A inooxangaa rek, yaal toole ke a ndiid, a mbiriɓ boo andkatee kaa da mbi’na.

¹⁸Oxuu faambnooxiiduuna yoo, laƥ ne ɗaxkiran tig, a salma le ne’aand mbaat a sakoor mbaat ƥonax nuu ta waagna waag o ref.

¹⁹Njelem kaa ref no ten nen o kangafaan, xanjar a ref nen a teex a potu.

²⁰Waagaand o raxit a kas, too a kac ake na suusaandeel, kaa nandan nen ñaax laa na dalan.

²¹O gul ole kaa ref no ten nen a tuuduuy, ta jalaa fangax le na kas ake.

²²Ɗuga o fud ole ten kaa jeg kaa saxitna nen xa paambaar xa beelu. A ƭooqlaand ale ten kam ɗok le kaa nand nen maa xa teng a teex a ƭooqeena.

²³Kaa jiqtaa qooƭ ke na juwaam fee nen a kaleera laa na waƴaa, a suptaa o maag ole nen ƭuumwel kaa njaxaseena no ƥaxañ.

²⁴A suurangaa, kaa xaƴaa a cinj um a ƭooq alaa na meleƈaa, took fee no qooƭ ke a nandat nen xa puum no nogoy.

²⁵O leng nandee fo ten took lanq ke. Kaa fi’el boo jegee no ten kaa na diidaa.

²⁶Kaa xeefaa muumeen pitnooxu ke, a ref o maad oxe no ƥaaɓaan soxodu ke fop.