Read NQAARIIT NE ROOG Yob 42 Bible Online

Yob 42 - NQAARIIT NE ROOG bible

Yob 42

¹Maaga, Yob a doona o Yaal oxe yee:

²Andataam ee waagaa fop, too ke yuuɓoona xoxirang o fadnel.

³Wo laamtaxam ee: «Ndi an oo xene na sufaaltaa yuuƥ ke mi fa lay fa andand?» Mi o mat oo, mi fee layna kaa xooleeraxama, yaƥat com’andtu kaa ngupaxama too andiim a den.

⁴Wo layaxam ee: «Nan-gilooxaam, um layong. Xam laamtong, o doonaam.»

⁵Kaam nan’u doŋ o layteel, ndaa ndiiki koy, a kid es a nga’oodaang.

⁶Ten taxu um naag ɓot no ke layuuma fop, ricooxaa tigi, moof no fo ut fo kam ndaw[14].

⁷A cinj ye o Yaal oxe a layna a Yob xa ƭelem axaaga, a laya a Elifaas fee genna Temaan ee: «Fuux es kaa biltooxanong, wo fo qaariit of ƭik ke, yaam nu layee na mi cagu, ta guutatir fo ke o tag es Yob a fi’na.

⁸Ndiiki koy, mbaaƭyo qoox ɓetuu ƭik fo a suk paal ɓetuu ƭik, nu ndet maa Yob fee o tag es, ƥoxotan a qoox nuun sadax toxel. Xan o tag es Yob a xeɗan a nuun too xam jaɓ a qeƭ um boo xawkiim a nuun a qaw gaci, ke nu layaneeraxama cagu fop oo, ta guutatir fo ke o tag es Yob a fi’na.»

⁹Elifaas fee genna Temaan fa Bildad fee genna Suwax fa Sofaar fee genna Naama a mbi’a ke o Yaal oxe a lay’ina a den, soo ta jaɓ a qeƭ ale Yob.

¹⁰A cinj ye Yob a xeɗanna qaariit ke ten, o Yaal oxe a nomtaan nen eetaand, a ɓaat boo a caf a ƭak halal fee Yob a jeg’ina yaaga.

¹¹Maaga, we ta fogitna faap fa yaay fo fop we and’uuna yaaga a ngara me ten, a ñaamaa fo ten kam mbind um. A ƭomatooxa soo a yaalin no taamaala ke o Yaal oxe a doon’uuna fop. Oxuu refna na den a ci’aan o monjong xaaliis fa nqoolu fo o heɗ wurus.

¹²O Yaal oxe a barke’a ke yoqna no ñoow ole Yob kupu ne ta fi’it’uuna eetaand. Neene, Yob a jeg’ata cegel cuni xarɓaxay fo cuni nahik na ked ake ten fo na xa siir naak axe ten, keeleemb ke a ndef cuni ɓetuu fa leng, qoox ke a ndef cuni ƭik, soo xa paam xa tew axe a ndef juni.

¹³A jegatina xa ƥiy xa koor ɓetaa ƭaq fo xa ƥiy xa tew xa tadaq.

¹⁴A ne’a o ƥiy o ndew o eetaand onqe Yemima, o ƭikandeer onqe ta ne’in Kesiya, soo o ndadkandeer onqe Keren-Hapuk[15].

¹⁵Kam saax laa fop jegee oxaa mositna nen xa ƥiy xa tew axe Yob. Faap den a las’a a den no lam ne nen jamin we den.

¹⁶Cinj kaaga, Yob a ñoowahina xa kiid teemeed fo xa kiid qarɓeen nahik. Neene, a ga’a xa ƥeem fo xa taan um fo xa tanaraat um boo no suk nahkandeer naa.

¹⁷Yob a ñoow’a boo a deyƭoox soo a xonkaa.