Read NQAARIIT NE ROOG Yob 9 Bible Online

Yob 9 - NQAARIIT NE ROOG bible

Yob 9

¹Yob a laya yee:

²Andaam a paax ee neene a jegtu, ndaa nam o kiin a ɓuritkaa a Roog?

³A bug’angaa o layoor fo ten, waagkee o jaaɓ leng sax no laamit juni um.

⁴Ten jegu o and, a may doole. An waagun o xox boo xawkaandee?

⁵Ten na sektaa xa coong axe, too yegkee teen tig, a jiƭtaa a den kam fuux um.

⁶Kaa yo’nitaa lanq ke na per ake den, a toodook ake njaƭna a den a sendaa.

⁷Kaa ta xañtaa njeeƈ ne ta wat, xa qoor axe, ta weg a den gik.

⁸Ten soom letnu asamaan fee, a hame a yag-ee-yag ake na juwaam fee.

⁹Ten saku xa qoor fa Ñiig axe, Ndaalaand ne, xa Kulook axe fo xa qoor axe no ɓemb-roog o ñamaak.

¹⁰Kaa fi’aa tig maak kaa mbaagaandeena o naaɓ, com’andtu kaa njegeerna hap.

¹¹Nga’yo, kaa reefaa paam es, too ga’kinum, a joonaam, too doonkinum a ngid.

¹²An waagun o xañit ta jang ke ta bugna? An na laykan ee: «Xar o fi’aa kene?»

¹³Roog a fuuxangaa, naagee ñofaa ɓoos. Rahab fee Niŋki-naŋka ne na juwaam fee fo yoon um kaa yenaa na caf um.

¹⁴Yaaga koy, nam um doonatiritkaa fo ten? Xa ƭelem axum um felaatooritkaa fo ten?

¹⁵Um ɓurangaa sax oo, jegiim kaa doonuuma, a refangee um xeɗooxin, ten fee o kaahate es.

¹⁶A jaɓangaa xet fa mi no layoor sax, gimiim ee xan a nan-gilooxaam,

¹⁷yaam ten na duguñaxam na xa koɓong, a ɓaataa kaañax es no kaa o leng a andeerna.

¹⁸Ci’iraam ñootand, a refangeerna a mayƭandaam fa naqad.

¹⁹Um ɓisangaan doole, ten hupaxam o ten fuuf. I ndetangaa na ƭat, an na feeñlankaxam o ten.

²⁰Um damangaa na ƭat sax oo, xan a damnoortaam o don es, um ɓur, ta layaam ee wo garu fo ke jegna.

²¹Jaambuur refum, ndaa a ƭat es yongee teen, bugatiim o ga o ñoow.

²²Dara haaliraam. Ten taxu um saɗ o lay ee: Roog kaa moocandaa o cofu xe, ne’atiim o cofaƭaru xe.

²³Boo o njakad a jegna soo a war caambuur ndak fo ndak, kaa jalaa naqad den.

²⁴Lanq ke a ƥoxote na xa ƥay no soxodu we, Roog a muur a kid ake no haahate we. A refangee o ten, an oo boog?

²⁵Ñaal ke mi moƴu o ñof oxaa na ƴufaa. Kaa ƈufaa, too nga’ee baneex.

²⁶Kaa ñof nen a kaal a pi’te xeet, nen a canjiik alaa waasooxanna ke ta bugna o dam.

²⁷Um layangaa yee: «Kaam bug o weec coono ke mi, fañat o gooy soo saqatin njambaar»,

²⁸kaam saɗaraa o ɗomahinel, yaam andaam xil ee fi’iraamo nen a jaambuur.

²⁹Feek xam gadnel tooñ ne, xar a ɗaxu um xoñ-xoñnaa!

³⁰Um ɓogooxangaa fo saafu sax oo, laxadit xa ƥay es weexal[3],

³¹xan o jooraam na derende, boo toki es a mbasnooxaxam.

³²Roog refee o kiin nen a mi, ndax um doonatir fo ten. Waagiim o layoorik fo ten.

³³A jeg’angaa rek o kaahate a ndeer in, oxaa ɓekna a in o ɓay,

³⁴yaaga ta donit o samb ole Roog took es, boo a qufil ake ten njom’andkatiraam!

³⁵Maaga, xam lay fo ten too saɗarkinum. Kaa koy, reftee neene, kaam ref koƭong mi fa xoox es.