Read NQAARIIT NE ROOG A kim a tedu ke 10 Bible Online

A kim a tedu ke 10 - NQAARIIT NE ROOG bible

A kim a tedu ke 10

¹O Yaal oxe, xar taxu o fod koƭu? Xar taxu o ɗasaa a in, yaa naqad a jegna?

²O soxodu xe kaa ñagadilaa ñaatu we took o nga’atinax. Kaa yenaa no yuuƥ paaxeer ke ta ɗaapna.

³O soxodu xe kaa fakoortaa a yuxum o laaw um. Oxe na ƴufanaa o jeg o xooleer kaa salooxaa o Yaal oxe soo a xaadnooxan.

⁴O soxodu xe xalamee fuux le no Yaal oxe too kaa layaa fo o cok um took ee: «Roog jegee.» Keene refu a qalaat um fop.

⁵A ƭat um kaa xenaa kili, kate of a ngup o and um, soo ta ɓiiñaa fañ um.

⁶Kaa layaa no xeeñ um ee: «Waagaandeem tig, too taamaala dalkiraam boo muk.»

⁷O don um kaa may fo a salax fo xa maaƥ fo naanaxir. Taamaala fo o njakad rek na hataa no ɗelem um.

⁸Kaa fogooxaa paam caate ke, a waraa na pet oxe fi’eeruuna dara, a kid um a mbelaa o ñaatu xe.

⁹Kaa ɗasaa a paax, a fogoox nen njogoy kam ngol, a ɓeedaa o ndool onqe ndax ta damin, a naagin nuus soo a ɗooqtin mbaal um.

¹⁰Kaa ƴuugaa, a ɓoodaa, soo ñaatu we a yen na xa ƥay um.

¹¹O soxodu xe kaa layaa no xeeñ um ee: «A ƭat Roog yongee teen. Kaa sing mukit um too naagee ga’aa dara.»

¹²O Yaal oxe, inooxi! Wo Roog, yoɗi o ɓay of! Ba o weec ñaatu we!

¹³Wo Roog, xar taxu o xaƴ o soxodu xe ta xaadnooxang boo a layaa yee a ƭat of yongee no ke ta fi’aa?

¹⁴Wo o mat, dara kunpa’irang. Kaa o ga’aa we na coono’aa fo we naqadilooxna, ndax o saytoorit a den o ɓay of. O ñaatu xe na wo a ɓoxotooxaa, too kaa o ƴufgaa o waan ole.

¹⁵Ɓoli a naax no soxodu xe, xaw kañaan um, ndax doonkataand a ngid.

¹⁶O Yaal oxe refu o maad boo faw, we mbaɗooxeeruuna xan a moocandel no saax um.

¹⁷O Yaal oxe, kaa o nan-gilooxaa ke neewandooxu we a yakaƥaaraa, soo ɓaataa a den njambaar. Kaa o rungaa nof of farna fa den,

¹⁸ndax o ɓoxot o waan ole fo xe na ñagadileel ɓur, too o kiin oxe refna lanq soom diidlandkatee o leng.