Read NQAARIIT NE ROOG A kim a tedu ke 102 Bible Online

A kim a tedu ke 102 - NQAARIIT NE ROOG bible

A kim a tedu ke 102

¹A qeƭ no ñaatu xaa doole um a fagna tak, ta ɗomatooxaa me no Yaal oxe.

²O Yaal oxe, nan-gilooxi a qeƭ es, too yaasam ƭomatax es a fadiid me wo.

³Ba o ɗasnaam mukit of, yaa refuuma na naqad. Rungi nof of farna fa mi, yaa um ƴufginooxaa, ñof o jaaɓaam.

⁴Ñaal ke mi we ndiimaa nen fo suun, soo cer es a ndoxaa nen o rukit.

⁵Xeeñ es kaa weeraa nen daaƭ gube, yaam kaam weec o ñaam.

⁶Xa kiiƈ xa ƥor yoqatum yaam xa iin.

⁷Kaam nandtaa a paɓaan na koƥ-a-ƥor, ref nen a sambaaƭ na pec.

⁸Kaam xonaa fo ƭaanar, nandtaa ndiiƭ mbootu took o faraaj.

⁹Fañ we mi kaa mbenaxam ñaal oo ñaal, we na sayanaxam a saloortaa gon es.

¹⁰Kaam buqaa ndaw nen mbuuru, too kuu um yeraa rek, xa kooniit es owaay kam faa.

¹¹Kam fuux of fo o fitnax of yoɗaxamo deɓaam maa goƭna.

¹²Ñaal ke mi kaa nand nen yook kirand, um weeraa nen daaƭ.

¹³Wo o Yaal oxe o mat, xan o maadaa boo kili, too gon of xan a ref no suk boo no suk.

¹⁴Xan o naag daket, yirim a Siyoŋ, yaam waxtu fee ta yirimkeel a fadiida. Kaam ee hap fee a fada.

¹⁵In we dag of, i mbexa a ƥil ake Yeerusaleem, yirim kefatin ke ten.

¹⁶Qeet ke xan a niw gon le no Yaal oxe, maad we na adna fee fop a saɗar o ndam um,

¹⁷yaam o Yaal oxe xan a maxatin a Siyoŋ, soo a feeñoox no ndam um.

¹⁸Xan a nan-giloox a qeƭ no we njegeerna o ndus, sibidkee a qeƭ den.

¹⁹Fat keene a bindanel suk ne na garaa, ndax xeet fee na sakatinkeel a simat o Yaal oxe,

²⁰yaam kaa rungnooxit no mbiñ o tedu nqe ten took-ee-took, a fod na asamaan, a ɗeetaa lanq ke,

²¹ndax ta nan-giloox xa iin axe no we ndameena, a wokit we mbaajaneena a bar.

²²Gon le no Yaal oxe xan a lambnel kam Siyoŋ, a simat um a njib kam Yeerusaleem,

²³yaa qeet ke a mbokatoorkaa den fop, maat ke a mbaɗooxiid o Yaal oxe.

²⁴Ye reeƭuuma na ƭat, a paanga doole es, a wañ a pe es.

²⁵Ten taxu um layin ee: «Wo Roog es fee faafkeerna muk, ba o jangaam meeke foduuma na doole es.»

²⁶Yaa sakoona lanq ke, a miña lool, too wo bindtu asamaan fee xa ƥay of.

²⁷Den o mat xan a mbaaf, ndaa wo o mat xan o yoq. Den fop xan a siɗoox nen ñirax. Xan o supit a den nen ndikoorik, soo da inoox meen, a ƥandit,

²⁸ndaa wo o mat, o leng kut oxe o refkaa ref, faafkiro muk.

²⁹Xa ƥiy axe no dag of xan a njeg ngenand, too xa taan den xan a maadaa mbaambir of.