Read NQAARIIT NE ROOG A kim a tedu ke 103 Bible Online

A kim a tedu ke 103 - NQAARIIT NE ROOG bible

A kim a tedu ke 103

¹A kim alaa fogna na ke Dawid oo. O laaw es, simati o Yaal oxe, fop ke refna na mi a gidim gon tedu um.

²O laaw es, simati o Yaal oxe too ba o weec paax ke ta fi’anoonga.

³O ten na waasantaa tooñ of fop, a wodandaa a cir of fop.

⁴O ten na wataa o ñoow of na jaaniif, a widnong o mbeq fa yirmande.

⁵O ten na mayƭandaa o ñoow of fo paax ƥor, a daknang o ndeɓandoong nen a canjiik.

⁶O Yaal oxe kaa fi’aa cofu, a ɓoxotaa ɓur we na ñaatlandeel.

⁷A andnoora a Moyiis a ƭat um, Ii-isra’el we, ta andnoor a den a pi a maak ake ten.

⁸O Yaal oxe kaa jeg yirmande, a yaaj kam, a muñantaa soo a may fo o mbeq.

⁹Naagee o xasanaa cay too geekkee fuux um boo kili.

¹⁰Naagee o damtaa a in pakaad in too naagee o rabdaa a in tooñ in.

¹¹Ne asamaan a gartitna lanq ke took, neene o mbeq um a magnitu no we saɗaruuna.

¹²Ne batand ne a goƭatiritna fo mudand, neene a goƭatirandtaa a in fo tooñ in.

¹³Ne faap a jegitna yirmande na xa ƥeem, neene o Yaal oxe a jegtu yirmande no we saɗaruuna,

¹⁴yaam a anda a paax ke i moolteena, a wetandooxa yee fo ut doŋ i ndefu.

¹⁵O ñoow no kiin kaa nand nen daaƭ xuƥu, a fiɗaa nen piɗ ke na koƥ ale.

¹⁶Nqeñ sumu xaa wuuɗan, refkatee, too o leng andidkatee me ta reeƭna,

¹⁷ndaa o mbeq no Yaal oxe kaa ref bo na moos boo moos no we saɗaruuna, soo o cofel um a gen fo xa ƥiy na xa ƥiy den,

¹⁸no we na ngayaa ngiɓoor um, a mbetandooxaa bargal um ndax da mbadin a den.

¹⁹O Yaal oxe kaa sip uum-maamaad um na asamaan, too maat um kaa langaamoox fop.

²⁰Simatyo o Yaal oxe, nuun malaaka ke ten, nuun a salma-koor a cegu doole ke na mbadnaa ke ta heblaa, yaa nu nanna o ñuxur um.

²¹Simatyo o Yaal oxe, nuun xiixire um fop, ndef dag um, mbi’aa ke refna o bug um.

²²Simatyo o Yaal oxe, nuun fop we ta sakna, fo muu nu mbaagna o ngen kam maat um. O laaw es, simati o Yaal oxe!