Read NQAARIIT NE ROOG A kim a tedu ke 104 Bible Online

A kim a tedu ke 104 - NQAARIIT NE ROOG bible

A kim a tedu ke 104

¹O laaw es, simati o Yaal oxe! O Yaal oxe Roog es, o magnel of jegee hap. Kaa o rokoox o ndam fo o niwel,

²huloox a qoolaand nen pay. Kaa o letin asamaan fee nen ƭiif,

³sip ngenand of took poofi ke took-ee-took. A eel ake ndefu a sareet of, o ñaaƴaa took a nafir ake no nqeñ ne.

⁴Qeñ ke fi’o duleer of, ƈulfaan ke, o fi a den dag of.

⁵Kaa o sip lanq ke took a per ake ten, too ngiiƈ-ngiiƈinkee boo muk.

⁶Juwaam fee kaa muur’u lanq ke nen ndoki, poofi ke a ngarit xa coong axe took,

⁷ndaa ŋalaa a den, da ƈuf, no fangax le no ƭuuɗ ne wo a ngoda o joor,

⁸a ƥordoortiidaa na xa cul axe, a mbudooxaa na yulanq ake boo no mbiñ onqe liiƥan’oona a den.

⁹Fiisanaa a den me da mbarna o nday, ndax ngarkatee a muur lanq ke.

¹⁰Wo na ɓakandaa a qayaandiin ake na banj ake, da nqayaa a ndeer xa coong axe.

¹¹Muumeen ke fop teen a yeriidaa, o faam-a-koƥ ole a watnitaa teen a koɗom um.

¹²Tiiƭ ke kaa ndutaa paam den soo a cococaa kam saqit le.

¹³Took-ee-took asamaan fodo, deɓaa took xa coong axe, lanq ke a ndeyƭoox na xa tim axe no jale of.

¹⁴Wo na saxnanaa cegel ke daaƭ le, jolnaa fop ke o kiin a xooxaa. Neene, lanq ke kaa cooxaa a den kaa da ñaamna,

¹⁵biiñ fee na felakinaa kam no kiin, diwliin fee na meleƈnaa mukit um fo ñaamel ke na ci’an doole.

¹⁶O Yaal oxe, taxar ke wo sax a njega foofi le da soxla’na, taxar seedar ke Libaŋ jimboona.

¹⁷Tiiƭ teɓ ke kaa ngaraa, a ndut teen, soo a caroox ale a raang no pilaawo ke.

¹⁸A suk pambe-koƥ ake njegu xa coong xa ciig axe, soo a ƥil ake a ndef ndaɗand no damaan[44] ke.

¹⁹Kaa o fi o nqool onqe, ndax o dalin baxtu ke, fi njeeƈ ne andna waxtu fee ta warna o mud.

²⁰Kaa o hebliidaa o niɓaan ole, soo ta yeng, muumeen-a-koƥ ke fop a ƭis.

²¹Fo njogoy fo njanglax ne kaa ŋuuraa, a mbidaa mbuufuɗag, a laamtang ñaamel den, wo Roog.

²²Njeeƈ ne a watangaa, da naang mes, a mbondook no qanq den.

²³Maaga, o kiin oxe a sutoox a jalik, a ref no faŋfaŋnaa boo yaa roog a yaarkaa.

²⁴O Yaal oxe, jale of jegee hap. Kaa o fi’it a den o and, den fop. Lanq ke kaa may muut fo sake le wo.

²⁵O maag ole ley a magin, a yaaj bo, muumeen pagkatar a ñoowaa teen, maak fo teɓ.

²⁶Meene a kaal ake a mbidaa fa Lewiyatan fee sakoona, ndax ta ŋasaa teen.

²⁷Fop ke sakoona na wo a ƭagu yaakaar den, ndax o cooxaa a den ñaamel a mbane da soxla’uuna.

²⁸Kaa o ci’an a den, da njangin, muƥit o ɓay of, da ngiñ tem.

²⁹O ɗasnangaa a den mukit of, da ndiid, o suqit na den haaƭ le, da nqon faq, a ndakooxatin fo ut.

³⁰Kaa o wuuɗaa haaƭ of, da sakel, ci’taa o ñoow o xas took lanq ke.

³¹Yaasam o ndam onqe no Yaal oxe a ref boo kili! Yaasam ta felakinoox no ke ta fi’na!

³²A ɗeetangaa lanq ke, da sendaa, nqol um a cuq xa coong axe, da suunaa bud-bud.

³³Xam gimanaa o Yaal oxe no ñoow o ñis es fop, xaanaa a Roog es no nqe yoqɗuuma na pe es.

³⁴Yaasam ke layuuma a felin! Mi kat kaam felakinooxaa no Yaal oxe.

³⁵Yaasam baabakaad we a ñuf no lanq ke, soxodu we a mooc teen! O laaw es, simati o Yaal oxe! Haleluyaa!