Read NQAARIIT NE ROOG A kim a tedu ke 105 Bible Online

A kim a tedu ke 105 - NQAARIIT NE ROOG bible

A kim a tedu ke 105

¹Ngidimyo o Yaal oxe, ƈufginoox gon um. Andnooryo a pi a maak ake ten a ndeer qeet ke.

²Ngimaneenoo, nqaanin, layit com’andtu ke ta fi’na fop.

³Mbakooryo gon tedu le ten. Yaasam a qeeñ no we na mbaaƭaa o Yaal oxe a mbelakinoox!

⁴Mbaaƭyo o Yaal oxe fa doole um, ngen no mbaaƭaa mukit um.

⁵Mbetandooxyo com’andtu ke ta fi’na, mbetandoox comlaand ke ten fo kate ke ten,

⁶nuun we mbaqaqoorna na Abraham fee o tag um, xa taan Yakoob axe ta jilna.

⁷Ten refu o Yaal oxe Roog in, kate um a langaamoox lanq ke fop.

⁸Kaa wetandooxaa kili ngiɓoor um, fa lay um fee ta cooxna suk cuni-cuni.

⁹Ten refu ngiɓoor ne ten fa Abraham, soo a woornitin a Isaak fo a taaƥ.

¹⁰Kaa dalnanin a Yakoob nen bargal, ngiɓoor naa na refkaa boo faw na Isra’el,

¹¹ye ta layna yee: «Xam cooxong lanq ke Kanaan, o jegkin, wo fo xa taan of,

¹²ke nu may’eerna may fop oo, ndax ndef xa kataakoon no saax le.»

¹³Kaa njoqooyooxoogu a ndeer saax fo saax, a ndeer maat fo ngend um.

¹⁴Ci’ee o leng ta ñagadil a den, too a xawa maad yaam den, a lay ee:

¹⁵«Ba nu nduq we ɗuumuuma, duleer es weene, ba nu mbi a den paaxeer!»

¹⁶Ye ta ɓisiidkaa biim no saax le, a fi ñaamel ke a mbag tak,

¹⁷a soƥ’a ta adnan a den o koor, ta ref Yoseef fee jikoox’eena, a refik o paɗ.

¹⁸A ŋaƭe ceen na caf, a rokel ceq njelem no cok

¹⁹boo neene ke ta yegnitna a fadnooxu, fa lay fee no Yaal oxe a ɓurnoorin.

²⁰O maad oxe a heblita ta woktel, o yaal oxeene no qeet ke a xaƴnooraan.

²¹A dodaan, ta adooxan maat um, a hame saax le Misira fop,

²²a kelfa gelwaar we ne ta bugitna, a aqatinaa maak we o and.

²³Maaga, Isra’el a gara Misira, kaam ee Yakoob a dalka no saax laa Xaam.

²⁴O Yaal oxe a fi’a xeet um a ndimatir, a ci’in ta hupat fañ um doole.

²⁵A ŋajnoora Miimisira we boo da sib xeet um, a ñaatlandaa dag we ten.

²⁶A luliida a Moyiis fee o tag um fa Aaroon fee ta jil’ina.

²⁷A mbadna a ndeer no Miimisira we xa anddiloor axe ta yegnit’ina, comlaand ke ten no saax laa Xaam.

²⁸A hebliida o niɓaan ole, too o niɓaan ole a gara, ndaa yaqanee Miimisira we a tipit[45] fa lay um.

²⁹A supta poofi ke den fo’oy boo liƥ ke den fop a nqon.

³⁰Saax le a maya fo a paaɓ boo no tok ke no mbind no maad ne.

³¹A laya, soo xa baxal axe a ngar, ƥook ke a ñipoox no jegel ole den fop.

³²A deɓana a den a kalam a ƥuuɓu fo aal fiɗel kam saax den.

³³A yaqa taxar biiñ ke den fo tun ke den soo a maaf taxar no jegel ole den.

³⁴A laya, soo tooroog ke a ngar, yaayaq kaa njegeerna hap.

³⁵A ñaama daaƭ le no saax den fop, a nduudin xa tim axe no lanq ke den.

³⁶A warnoora taaw koor ke no saax den fop, qaaƴoor ke den fop.

³⁷A suta xeet um, da ƥisloox xaaliis fa wurus, too o leng tolofee na carind ake ten.

³⁸Misira a felakinooxa na sutax ale den, yaam a saɗaroogu a den ƭomu.

³⁹O Yaal oxe kaa saytoortoogu a den eel, aal fiɗel a xoolandanaa a den o yeng ole.

⁴⁰Ye da nqeɗuuna, a fudniida a ceɓel, soo a ci a den mbuuru aa-asamaan, da ñaam boo a ngiñ.

⁴¹A weta ɓil le, soo foofi a balit teen, a xayaa kam o tan ole nen o xuluɓ.

⁴²A wetandooxa fa lay fa tedu um fee ta lay’ina fa Abraham fee o tag um.

⁴³Xeet um kaa mbelakinoox’u, ye ta sutaa a den, we ta jilna a ƈeelaa.

⁴⁴A cooxa a den lanq ke na saax ake, da muudoor jale no qeet lakas ke,

⁴⁵ndax da ndeef bargal um, a ngay kebil um. Haleluyaa!