Read NQAARIIT NE ROOG A kim a tedu ke 107 Bible Online

A kim a tedu ke 107 - NQAARIIT NE ROOG bible

A kim a tedu ke 107

¹Ngidimyo o Yaal oxe, yaam a faaxa, too o mbeq um xan a maadaa boo faw.

²Fat we o Yaal oxe a watna a lay neene, we ta watitna no ɓay no ñaañagadil oxe

³soo a fokatit a den na saax ake fop, no batand fo no mudand, no ɓemb-roog o janoon fo no ɓemb-roog o ñamaak.[46]

⁴Kaa njoqooyooxoogu kam a koƥ-a-ƥor ale, no saax laa jegeerna a ƭat a leng, too nga’ee teeru faa geneena.

⁵Kaa nqeexel, a ngoɗomel, a yoqɗoorel fa nqon.

⁶Maaga, kam naqad den, a ƈufginooxa o Yaal oxe, soo ta sut a den no coono den.

⁷A xotnoora a den a ƭat a cagu, da ndokik na teeru faa geneena.

⁸Fat boog da ngidim o Yaal oxe no mbeq um fo no com’andtu ke ta fi’anna xa ƥiy Aadama!

⁹Kaa ci’aa oxe hoɗomeena ta yer, a giñnoortaa o qeexe xe ñaamel pelu.

¹⁰Kaa ngen’u no niɓaan ole fo na pelyook fa nqon fee, a ndef faɗ ñaatu waa ŋaƭeena ceen,

¹¹yaam a nanaƭaran fa lay Roog, a nqeef xa as no xe Took-ee-took.

¹²Ten taxu Roog a gefit a qeeñ den coono, da tolof, too o leng dimle’ee a den.

¹³Maaga, kam naqad den, a ƈufginooxa o Yaal oxe, soo ta mucil a den no coono den.

¹⁴A suqta a den no niɓaan ole fo na pelyook fa nqon fee, a daƈit a ceng ake den.

¹⁵Fat boog da ngidim o Yaal oxe no mbeq um fo no com’andtu ke ta fi’anna xa ƥiy Aadama!

¹⁶Kaa daƈtaa begax xanjar ke, a ɓolaa a kinglir a celem ake.

¹⁷Kaa ƥodax’u, a pesoorooƭ den a yednu a laltin, a ñaat yaam ndoq ne no tooñ ke den.

¹⁸Ñaamel kuu ndefna kaa mbat’u a den xus, soo da ndet’u boo a cuqaa xa ton-maax axe na fa nqon fee.

¹⁹Maaga, kam naqad den, a ƈufginooxa o Yaal oxe, soo ta mucil a den no coono den.

²⁰A hebliida fa lay um, a wodandtin a den, a suudit a den na fa nqon fee.

²¹Fat boog da ngidim o Yaal oxe no mbeq um fo no com’andtu ke ta fi’anna xa ƥiy Aadama!

²²Fat da ƥoxotin sadax fa ngidmir, a mbetandit ke ta fi’na, a yoonandtin xa soroxole!

²³Kaa ñaaƴoogu kam o maag ole na kaal, a mbi’aa calel den took poofi maak ke.

²⁴A nga’a ke o Yaal oxe a waagna fo comlaand ke ta fi’aa no qooƭ ke no maag ole.

²⁵A laya, soo ta fi a und a maak alaa yoɗna a yag-ee-yag ake.

²⁶Kaa koloogu took, a mbudooxaa no qooƭ ke, kam den a fag yaam coono ke no maag ole,

²⁷da miriilel, a njayang-njayangnaa nen o kiin o bayu, o and den fop a uupoox.

²⁸Maaga, kam naqad den, a ƈufginooxa o Yaal oxe, soo ta sut a den no coono den.

²⁹A riimanda a und ale, soo a yag-ee-yag ake a naang hem.

³⁰A mbelakinooxa ne fop a naag’atna yereŋ, too o Yaal oxe a ɗoxa a den boo na waax faa da mbug’ina.

³¹Fat boog da ngidim o Yaal oxe no mbeq um fo no com’andtu ke ta fi’anna xa ƥiy Aadama!

³²Fat da niwin kam mbokatax ne na xeet fee, a simatin kam o xet ole no maak we.

³³Ten suptu xa quluɓ axe a koƥ-a-ƥor, me a cur foofi a ndaxritoogna, ta suptin lanq beeru,

³⁴lanq qaaɗu ke, ta supit a den o tan yaam kañaan no we ngen’ina teen.

³⁵A supta itam a koƥ-a-ƥor ale peel, lanq beeru ke, ta supit a den maa a cur foofi a ndaxritaa.

³⁶A gennoora teen waa nqeex’eena, da max teen teeru den,

³⁷a nduufaa xa qol, a njimbaa taxar biiñ, da ndimaa boo a ƭooqaa.

³⁸O Yaal oxe a barke’a a den, da mayat, too xaƴee cegel den da kasaara’oox.

³⁹A mbañooxa soo a neewandtel taamaala fo naqad kaa ndal’ina a den.

⁴⁰Kaa koy, o Yaal oxe na fi’aa garmi ke a nqeefel, a xaƴaa a den da njoqooyooxaa kam a koƥ-a-ƥor alaa jegeerna a ƭat,

⁴¹a mucla rool weene no ñaat, a mayƭand ƥasil den nen xa siir.

⁴²Wiin jofu we a nga’aan soo a mbelakinoox, njofaƭar nuu refna a naag cuxus.

⁴³Oxuu jegna o and fat a dam keene too a ɓaal ke o Yaal oxe a fi’na no mbeq um.