Read NQAARIIT NE ROOG A kim a tedu ke 115 Bible Online

A kim a tedu ke 115 - NQAARIIT NE ROOG bible

A kim a tedu ke 115

¹Baa ref na in, o Yaal oxe, kaam ee baa ref na in, ndaa no gon of ɓoxoti o ndam, yaam kaa o jeg o mbeq fo ngor!

²Xar na taxkaa qeet ke a layaa yee: «Taa Roog den boog?»

³Roog in oxaay na asamaan, a fi’aa fop ke ta bugna.

⁴Den o mat, pangool den ndefu nitaal xaaliis fa wurus ke o ɓay no kiin a jalna.

⁵Kaa njeg xa ton, ndaa nee yaƥataa, a njeg a kid, ndaa nee nga’aa,

⁶a njeg nof, ndaa nee nanaa, a njeg xa ñis, ndaa dara nee duñaa a den.

⁷Kaa njeg xa ƥay, ndaa nee nduqaa, a njeg a caf, ndaa nee ñaaƴaa. Fangax leng nee hataa no faƭanq den.

⁸We njalna a den fa den a nandu, boo no we ƭagna yaakaar den no nitaal keene.

⁹Nuun xeet fee Isra’el o mat, ƭagyo yaakaar nuun no Yaal oxe, ten fee refna ƈufig nuun fo pegoor nuun.

¹⁰Nuun mbind Aaroon, ƭagyo yaakaar nuun no Yaal oxe, ten fee refna ƈufig nuun fo pegoor nuun.

¹¹Nuun we saɗarna o Yaal oxe, ƭagyo yaakaar nuun no Yaal oxe, ten fee refna ƈufig nuun fo pegoor nuun.

¹²O Yaal oxe a wetandooxa a in too xan a barke a in. Kaam ee xan a barke mbind Isra’el, a barke mbind Aaroon.

¹³O Yaal oxe xan a barke we saɗaruuna, maak fo xa caaƈ.

¹⁴Yaasam o Yaal oxe a mayƭand a nuun, nuun fo xa ƥiy nuun!

¹⁵Yaasam o Yaal oxe sakna asamaan fo lanq a barke a nuun!

¹⁶Asamaan fee asamaan no Yaal oxe yoo, ndaa xa ƥiy Aadama a cooxu lanq ke.

¹⁷Refee yee xon we na simataa o Yaal oxe, o leng no we mbudooxna jaaniif tagaskiran,

¹⁸ndaa in o mat na simataa o Yaal oxe, no ke xotitna ndiiki bo na moos boo moos. Haleluyaa!