Read NQAARIIT NE ROOG A kim a tedu ke 118 Bible Online

A kim a tedu ke 118 - NQAARIIT NE ROOG bible

A kim a tedu ke 118

¹Ngidimyo o Yaal oxe, yaam a faaxa, too o mbeq um xan a maadaa boo faw.

²Fat Isra’el a lay ee: «O mbeq um xan a maadaa boo faw.»

³Fat mbind Aaroon a lay ee: «O mbeq um xan a maadaa boo faw.»

⁴Fat we saɗarna o Yaal oxe a lay ee: «O mbeq um xan a maadaa boo faw.»

⁵Kam ee kam naqad fee ƴufginooxaam o Yaal oxe, too a jaaɓaxam, a ɓisaam maa yaadoortuuma.

⁶O Yaal oxe a refanaxam, saɗariim dara. Xar wiin we a mbaagankaxam?

⁷O Yaal oxe refu ƈufig es, too xam yidaa fañ es we maafeena.

⁸O jaɓnoox no Yaal oxe moƴu yee o ɗagaa yaakaar of no kiin.

⁹O jaɓnoox no Yaal oxe moƴu yee o ɗagaa yaakaar of no wiin maak we.

¹⁰Qeet ke fop kaa ndeer’aam, ndaa no gon no Yaal oxe xoxaam a den.

¹¹Kaa ndeer’aam, a mbid’aam o kurul-keƥ, ndaa no gon no Yaal oxe xoxaam a den sup.

¹²Kaa ndeer’aam nen fomb quuraand, ndaa a sooya nen qooc kam fiɗel. No gon no Yaal oxe xoxaam a den.

¹³Kaam riñoogel, ndax um maafel, ndaa o Yaal oxe a ƴufgaxam.

¹⁴O Yaal oxe refu doole es, too ten soom um gimaa, ten fee o Muumucil es.

¹⁵Xa buuq o ɗaay fo a muc a njibta no ƭiif ke no jofu we: «A ñamaak no Yaal oxe kaa fi’aa a pi katil.

¹⁶A ñamaak no Yaal oxe kaa yoɗoox, a ñamaak no Yaal oxe kaa fi’aa a pi katil.»

¹⁷Xonkiim boog, ndaa xam ñoowaa, yegnitaa a pi ake no Yaal oxe.

¹⁸Ndigil oo kañ ee o Yaal oxe a yaraxam a yar, ndaa koy xaƴiraam um xon.

¹⁹Mbetanaamoo xa ton-maax axe no cofel ole, ndax um rok teen, gidim o Yaal oxe.

²⁰Keeke refu o don-maax ole no Yaal oxe, teen jofu we a ndoktaa.

²¹O Yaal oxe, kaam gidmang, yaam jaaɓaxamo too muclaam.

²²Ɓil le maamax we a ndeɓ’ina refatu ɓil faraaj le.

²³Keene no Yaal oxe a inooru, too njomlaand oo na kid in.

²⁴Keeke refu ñaal ne o Yaal oxe a fi’na. Fat i mbelakinoox teen too njeg o ɗaay!

²⁵O Yaal oxe, ngela mucli a in![50] O Yaal oxe, ngela ci’i a in fo jem!

²⁶Oxe na garaa no gon le no Yaal oxe a hela simatel. In we mbarke’taa a nuun kam Mbind ne no Yaal oxe.

²⁷O Yaal oxe refu Roog too kaa meleƈnaa took in a qoolaand um. Pokooxyo a naaq, mbumbaayaa, mbi a yaj boo na xa can axaa no sadaxand ole.

²⁸Wo refu Roog es, too kaam gidmang, Roog es, mexe niwang.

²⁹Ngidimyo o Yaal oxe, yaam a faaxa, too o mbeq um xan a maadaa boo faw.