Read NQAARIIT NE ROOG A kim a tedu ke 119 Bible Online

A kim a tedu ke 119 - NQAARIIT NE ROOG bible

A kim a tedu ke 119

¹Ndaw o ɗaay no we na ñaaƴtaa ne ta helitna, a ndeefaa a cangin no Yaal oxe.

²Ndaw o ɗaay no we na ngayaa ngiɓoor um, soo a mbaaƭan fo a qeeñ den fop.

³Weene naangee o mbi’aa paaxeer leng, ndaa kaa ñaaƴaa na ƭat um.

⁴Dalnaa bargal ke wo, ndax da ndeefel a paax.

⁵Koo, yaasam ba um ɗap a ƭat es, ndax um gayaa ke dalnoona.

⁶Yaaga sedkiim, yaa haanuuma no kebil ke wo fop.

⁷Kaam gidmang fo xeeñ jofu, yaa um jangaa ke simtoona no cofel of.

⁸Kaam gayaa ke dalnoona, ba o waasaam pelek.

⁹Nam o ndeɓandoong onqe a jegitkaa o ñoow o xoolu? Yaa ta gayaa ke hatna no don of.

¹⁰Kaam waaƭang fo xeeñ es fop, ba o xaƴaam um ɗap kebil of.

¹¹Kaam migin xa ñuxur of no xeeñ es, ndax tooñkiroong.

¹²O Yaal oxe, helaa o simatel! Aqatinaam ke dalnoona.

¹³Kaam lambnaa ke simtoona fop.

¹⁴Kaam felakinooxaa, yaa um reefaa fa lay of, nen kaam jeg halal fa mbagkatar.

¹⁵Kaam ɓaalaa taa kam es bargal of, haan na ƭat of.

¹⁶Kaam jegtaa o ɗaay no ke dalnoona too weeciim ke hatna no don of.

¹⁷Faaxtaam, mi fee o tag of, ndax um ñoow soo gay ke hatna no don of.

¹⁸Weti a kid es, ndax um ga a paax comlaand ke na cangin of.

¹⁹O gataakoon refum took lanq ke, ba o ɗasnaam kebil of.

²⁰O laaw es kaa diilooxaa na waxtu fuu refna ke simtoona.

²¹Kaa o xasanaa ga’atinooxu we, salooxe weene ngoƭna kebil of.

²²Sambrandaam fo a ben ake fo o xeefel, yaam kaam gayaa fa lay of.

²³Gelwaar we a ngiɓanangaam o ngir sax oo, xam ɓaalaa taa kam es ke dalnoona, mi fee o tag of.

²⁴Fa lay of na ɗaaynooraxam, teen um xottaa xa as.

²⁵Mexe luuñaa no fo ut ole, fi’i um ñoowaa no ke hatna no don of.

²⁶Wetandooxaaxoong me reefuuma, too jaaɓaxamo, aqatinaam ke dalnoona.

²⁷Andnooraam ke bargal of a tekitna, too xam ɓaalaa taa kam es com’andtu ke wo.

²⁸O laaw es ole sooyaa yaam naqad, inatintaam ke hatna no don of.

²⁹Guutatirandaam fo a ƭat a maamaaɓ ale, too andnooraam a cangin of kam yirmande of.

³⁰Kaam jil a ƭat ale no ndigil ne, geenoox no reef ke simtoona.

³¹O Yaal oxe, kaam saaƭoox na fa lay of, koo ba um sed muk.

³²Kaam ƴufaa na ƭat ale no kebil of, yaam dalnaa o laaw es.

³³O Yaal oxe, aqatinaam ke dalnoona, too xam reefin bo ta dey.

³⁴Ci’aam yiif, ndax um reef a cangin of, gayin fo xeeñ es fop.

³⁵Ɗoxaam na ƭat ale no kebil of, yaam teen um jegtaa o ɗaay.

³⁶Joobni xeeñ es farna fo fa lay of, ndaa baa ref no ke ta ƴufanaa.

³⁷Fegi a kid es boo ƭeetkee xa koɓong, too fi um ñoowaa na ƭat of.

³⁸Fadnanaam a tegit of, mi fee o tag of, ale refanna we saɗaroonga.

³⁹Guutatirandaam fo a ben ake um saɗaraa, yaam ke simtoona rek faaxu.

⁴⁰Bargal of um diilooxaa, fi’i um ñoowaa no cofel of.

⁴¹O Yaal oxe, fat o mbeq of a xay na mi, muclaam ne regtitanoona.

⁴²Yaaga xam jeg kaa doonuuma we na mbenaxam, mi fee hoolooxna ke hatna no don of.

⁴³Fat fa lay fa ndigil a hataa no don es kili, yaam kaam cungaa ke simtoona.

⁴⁴Xam gen no gayaa a cangin of kili, boo faw.

⁴⁵Kaam ñaaƴaa fo o laaw o dalu, yaam bargal of um widaa.

⁴⁶Kaam layaa mbaambir maad we fa lay of too sedkiim.

⁴⁷Ñaamel es ndefu kebil of, um fex a den bo ta hup.

⁴⁸Kaam letin xa ƥay es farna fo kebil of ke fexuuma bo ta hup, ɓaalaa taa kam es ke dalnoona.

⁴⁹Wetandooxi ke layaxamoona, mi fee o tag of, too ta ci’aam yaakaar.

⁵⁰Keene refu yaaloor es kam o ñaat es, yaam o ñuxur of na ñoownaxam.

⁵¹Ke ga’atinooxu we a nqaadnooxaxam fop oo, taxee um ɗap a cangin of.

⁵²O Yaal oxe, kaam wetandooxaa ke simtoona yaaga, too teen um xottaa yaaloor es.

⁵³Kaam fuux boo buɓaa yaam soxodu we mbesna a cangin of a cinj.

⁵⁴A kim es fop ke dalnoona yoo kam mbind neeke refuuma o tak-o-faaf.

⁵⁵O Yaal oxe, kam o yeng ole sax, kaam wetandooxaa oxe refoona, gayaa a cangin of.

⁵⁶Ke haalaxama tigi refu um dam bargal of ta xiis.

⁵⁷O Yaal oxe, kaam ee a las es refu um gayaa ke hatna no don of.

⁵⁸Fo xeeñ es fop, waaƭaam o felong, yirmaam ne regtitanoona.

⁵⁹Kaam horooxaa a ƭat es soo saktiid o jaf es farna fo fa lay of.

⁶⁰Fodandooxiim, kaam ñofandooxaa, ndax um gay kebil of.

⁶¹Pog ke no soxodu we kaa ndeeraam, ndaa taxee um weec a cangin of.

⁶²Kaam inooxaa ndeer ee ndeer o yeng, ndax um gidmong yaam bargal cofu ke wo.

⁶³O yoon no we saɗaroonga fop too a ngayaa bargal of refum.

⁶⁴O Yaal oxe, lanq ke kaa may fo o mbeq of, aqatinaam ke dalnoona.

⁶⁵O Yaal oxe, ne regtitanoona, fi’anaxamo paax, mi fee o tag of.

⁶⁶Aqatinaam o jeg-yiif fo o and, yaam no kebil of rek hoolooxum.

⁶⁷Kaam mo’’u mir yaaga neewandaandeem, ndaa ndiiki o ñuxur of um gayaa.

⁶⁸O Yaal oxe, kaa o faax too fi’aa paax, aqatinaam ke dalnoona.

⁶⁹Ga’atinooxu we kaa ndoɗgantaxam xa maaƥ den, ndaa yaqanee um gayaa bargal of fo xeeñ es fop.

⁷⁰Xeeñ den kaa ŋaaɗ nen neebam, ndaa mi o mat, a cangin of na ɗaaynooraxam.

⁷¹Paax oo na mi ye neewandeema, yaam a aqatinaxam ke dalnoona.

⁷²A cangin ale hatna no don of moƴanaxam xa monjong cuni-cuni wurus mbaat xaaliis.

⁷³Xa ƥay of moolaxam, a sakaam, ci’aam o jeg-yiif boog, ndax um aqatoox kebil of.

⁷⁴We saɗaroonga xan a mbelakinoox, yaa da nga’axama, yaam kaam yaakaar ke hatna no don of.

⁷⁵O Yaal oxe, andaam ee ke simtoona a jofa, too wo ɓuru neewandaam.

⁷⁶Fat o mbeq of a gar a yaalaam ndiiki, ne laytaxamoona o ten, mi fee o tag of.

⁷⁷Yirmaam, too yaaga xam ñoow, yaam a cangin of na ɗaaynooraxam.

⁷⁸Fat ga’atinooxu we na ñagadiltaxam cegeer a sed, mi kaam ɓaalaa bargal of taa kam es.

⁷⁹Fat we saɗaroonga a nomtooxiid me mi, den we andna fa lay of.

⁸⁰Fat xeeñ es a saaƭoox no ke dalnoona, ndax sedkiim.

⁸¹O laaw es kaa tayaa o muclaam, yaakaar es a ref no ke hatna no don of.

⁸²A kid es ake kaa nqooɗat, yaam a tayaa ke regtoona, um laamtataa yee: «A mban o yaalkaxam?»

⁸³Kaam nandtaa mboxos naa fo suun a ŋoroɓna, ndaa weeciim muk ke dalnoona.

⁸⁴Kaam bugko cungaa boo a mban, mi fee o tag of? A mban o hate’kaa we na ñagadilaxam?

⁸⁵Wiin ga’atinooxu waa a ƭat den a yongeerna na cangin of a ngasanaxam a kamb.

⁸⁶Kebil of fop kaa njof. Mexey ñagadilteel cegeer, ƴufgaam.

⁸⁷A yoq’a o ndik rek, um moocandel no lanq ke, ndaa taxee um fes a cinj bargal of.

⁸⁸Fi’i um ñoowaa na pexey o mbeq of, ndax um gay fa lay of.

⁸⁹O Yaal oxe, ke hatna no don of xan a maadaa boo faw, a seek um alaay na asamaan boo xoo.

⁹⁰Ngor of kaa ref no suk boo no suk, o sip lanq ke, da naang koŋ a saƭik.

⁹¹Ke simtoona taxu fop a ref boo xaye, too wo sake le fop a refanu.

⁹²Um jeg’angee a cangin of ale na ɗaaynooraxam, xonitkoogaam o ñaat es.

⁹³Weeckiim muk bargal of, yaam na den o ñoownitaxam.

⁹⁴Wo refanum, muclaam, yaam bargal of um jaqtaa.

⁹⁵Soxodu owe ƥengaxam, ndax da saŋkaam, ndaa fa lay of um ɓaalaa.

⁹⁶Ga’aam ee kuu refna a jega muukandoong, ndaa kebil of o mat, o yaajel den jegee hap.

⁹⁷Bugaam a cangin of boo waagaand o lay, um ɓaalan taa kam es no ñaal ne fop.

⁹⁸Kebil of ke ndefna fa mi kili na taxaxam o hup fañ es o and.

⁹⁹Mi hupu jaajangin es fop o and, yaam fa lay of um ɓaalaa.

¹⁰⁰Mi moƴu o jeg yiif maak we, yaam kaam gayaa bargal of.

¹⁰¹Kaam fañ faƥit ee xotkiim a ƭat a paaxeer, ndax um gay ke hatna no don of.

¹⁰²Fesiim a cinj ke simtoona, yaam wo na aqatinaxam.

¹⁰³A tegit of kaa mbel lool no faƭanq es. Den moƴu o mbel suum no don es.

¹⁰⁴Xottaam o and no bargal ke wo, ten taxu um sib a ƭat a maamaaɓ aluu refna.

¹⁰⁵Fa lay of a refa o lampa na caf es, a ref a qoolaand took a ƭat es.

¹⁰⁶Daaɓooxaam too a woora yee xam gay ke simtoona no cofel of.

¹⁰⁷O Yaal oxe, ñaatland’eem bo ta hup, fi’i um ñoowaa no ke hatna no don of.

¹⁰⁸O Yaal oxe, jaɓi a qeƭax es nen sadax katu no don es too aqatinaam ke simtoona.

¹⁰⁹O ñoow es ole no xoƥ nquƭ cay, ndaa weeciim muk a cangin of.

¹¹⁰Ke soxodu we a ƭaapanaxama mbog fop oo, taxee um ɗap bargal of.

¹¹¹Fa lay of refu lam es boo kili, yaam ten refu o ɗaay xeeñ es.

¹¹²Kaam ɗoftaa o fadin kili ke dalnoona, no kuu ta waagna o ref.

¹¹³Kaam sib we ngid-a-ƭakna soo fex a cangin of.

¹¹⁴Wo refu njaɓnooxand es fo pegoor es, kaam cungaa ke hatna no don of.

¹¹⁵Ndiƈatooxaamoo, nuun soxodu we, ndax um gay kebil ke Roog es.

¹¹⁶Ne regtitanoona, damtaam ndax um ñoow, ba o tas yaakaar es.

¹¹⁷Refi ndamlooxand es, ndax um muc, jofnoox kili no ke dalnoona.

¹¹⁸Kaa o raxaa fop we ndeefkeerna ke dalnoona, o ƴiƴ den cegeer ƥor oo.

¹¹⁹Kaa o pildaa soxodu we no lanq ke nen ƭaaq, ten taxu um fex fa lay of.

¹²⁰Cer es kaa sendaa, yaam o diidlandaam, um saɗar kate of.

¹²¹Fi’aam ke simtoona fo ke jofna, ba o ɓoxotaam na xa ƥay no ñaañagadil es.

¹²²Gadooxaam, ndax fop a faax na mi fee o tag of, baa ga’atinooxu we a ñagadilaam.

¹²³A kid es kaa nqooɗat, yaam a tayaa o muclaam, a naaɓaa a tegit a cofu ke wo.

¹²⁴Lalaam o mbeq of, mi fee o tag of, too aqatinaam ke dalnoona.

¹²⁵O tag of refum, weti yiif es, ndax um and fa lay of.

¹²⁶O Yaal oxe, fadaa o fesoor tig, yaam a cangin of a ƭape.

¹²⁷Kebil of moƴanaxam kuu refna, den moƴanaxam wurus boo na wurus fa nqoolu fee.

¹²⁸Bargal ke wo fop ne da mbodeena kaa njofooxaam, um sib a ƭat a maamaaɓ ake fop.

¹²⁹Fa lay of jegee sik, ten taxu um gayan.

¹³⁰Ke hatna no don of a feeñooxangaa, a ɓisiid a qoolaand, a ci’aa we ndaƥna yiif o jeg-yiif.

¹³¹Kaam yaƥat o don es bo ta fag, duñnooxaa, yaam kaam sooɓel kebil of.

¹³²Geleerooxi farna fa mi too yirmaam, ne ta helitna no we mbexna gon of.

¹³³Saƭkandti o jaf es o ñuxur of, too ba o xaƴ paaxeer leng a hupaam doole.

¹³⁴Wataam no wiin we na ñagadilaxam, ndax um gay bargal of.

¹³⁵Lalaam a tagid of, mi fee o tag of too aqatinaam ke dalnoona.

¹³⁶A kid es kaa nqaaraa fo xa kooniit, yaam ne a cangin of a reefaandeena.

¹³⁷O Yaal oxe, kaa o jof, too ke simtoona kaa jof itam.

¹³⁸Kaa o cooxtit fa lay of o cofel fo ngor maak.

¹³⁹Kaam fuuxaa boo waagkatiim o lay, yaa ga’uuma fañ es a mbeecaa ke hatna no don of.

¹⁴⁰O ñuxur of kaa ɗeetlooxel ne ta fodeena fop, too fexaanum, mi fee o tag of.

¹⁴¹Kaam xeefel soo sibel, ndaa weeciim bargal of.

¹⁴²O cofel of xan a ref boo faw, too a cangin of ndigil kak oo.

¹⁴³Naqad fo ɗom a ndalaxam, ndaa kebil of na ƭaaynooraxam.

¹⁴⁴Fa lay of kaa jof kili, ci’aam o jeg-yiif, ndax um ñoowaa.

¹⁴⁵O Yaal oxe, kaam ƴufginooxang fo xeeñ es fop, jaaɓaam, ndax um gay ke dalnoona.

¹⁴⁶Mexe ƴufginooxang, muclaam, ndax um reef fa lay of.

¹⁴⁷Kaam xeɗang boo mbeet ne a helko fo leelaa, cungaa ke hatna no don of.

¹⁴⁸Kaam naagaa jar a kid es, hirnaa, ndax um ɓaalaa taa kam es o ñuxur of.

¹⁴⁹O Yaal oxe, kam o mbeq of nan-gilooxi o ñuxur es too fi um ñoowaa no ke simtoona.

¹⁵⁰Ñaañagadil soxodu owe matiidaa, a ngoƭatir fo a cangin of.

¹⁵¹Wo o Yaal oxe, matiidaa, too kebil of fop ndigil kak a ndefu.

¹⁵²Andaam yaaga yee kaa o dalin fa lay of boo kili.

¹⁵³Ga’i o ñaat es too muclaam, yaam weeciim a cangin of.

¹⁵⁴Fartaam, wataam too fi um ñoowaa ne regtitanoona.

¹⁵⁵A muc ale xalamee mat soxodu we, yaam naaɓee ke dalnoona.

¹⁵⁶O Yaal oxe, xeeñ of kaa may yirmande, fi’i um ñoowaa no ke simtoona.

¹⁵⁷Mayaam ñaañagadil fo fañ lool, ndaa taxee um ɗap fa lay of.

¹⁵⁸Hoohod we kaa mbataam xus, wiin weene ngaykeerna o ñuxur of.

¹⁵⁹O Yaal oxe, ga’i ne fextuuma bargal of, fi’i um ñoowaa no mbeq of.

¹⁶⁰Ke hatna no don of fop ndigil a refu, too fop ke simtoona no cofel of kaa ref boo faw.

¹⁶¹Gelwaar owe ñagadiltaxam cegeer, ndaa ke hatna no don of doŋ na diidnooraxam.

¹⁶²Kaam felakinooxaa no ñuxur of nen oxaa gisna njangal maak.

¹⁶³Kaam sib o maaɓ, feliraam dara, ndaa a cangin of o mat, fexaanum.

¹⁶⁴Kaam simatang a caf ɓetaa ƭaq ñaal nuu refna yaam ke simtoona no cofel of.

¹⁶⁵We mbexna a cangin of a maya jam, dara tolofnoorkee a den.

¹⁶⁶O Yaal oxe, kaam cungaa o muclaam, fi’aa ke hebloona.

¹⁶⁷Kaam gayaa fa lay of fo ngiin es fop, fexin bo ta hup.

¹⁶⁸Kaam gayaa bargal of fo fa lay of, yaam muu um fodaa, mexey mbaambir of.

¹⁶⁹O Yaal oxe, fat o soroxole es a nannoox me wo, ke hatna no don of a ci’aam o jeg-yiif.

¹⁷⁰Fat a qeƭax es a fadiid me wo, o wataam ne regtitanoona.

¹⁷¹Fat muuceek es a yegnitaa a simat of, yaam kaa o aqatinaxam ke dalnoona.

¹⁷²Fat ɗelem es a kañaa o ñuxur of, yaam kebil of fop kaa njof.

¹⁷³Fat o ɓay of a dimle’aam, yaam kaam jil bargal of.

¹⁷⁴O Yaal oxe, kaam tayaa a muc of, too a cangin of na ɗaaynooraxam.

¹⁷⁵Fat o laaw es a ñoowaa, a simatang, soo ke simtoona a dimle’aam.

¹⁷⁶Kaam joqooyooxaa nen mbaal mo’u. Gari waaƭiidaam, mi fee o tag of, yaam weeciim muk kebil of.