Read NQAARIIT NE ROOG A kim a tedu ke 132 Bible Online

A kim a tedu ke 132 - NQAARIIT NE ROOG bible

A kim a tedu ke 132

¹A kim no ñaañaaƴ we yoo. O Yaal oxe, wetandooxi a Dawid fo coono ke ta gomna fop!

²A daaɓooxa fo o Yaal oxe, a regoor fo o Cegu Doole xe Yakoob ee:

³«Rokkiim kam ƭiif ne genuuma, ŋaaykiim took njong ne um wondooxaa,

⁴ci’kiim a kid es sax da ƭaan, ci’kiim xa poombooñ es maa da nimitna,

⁵a refangee kaam ga’an o Yaal oxe o moofand, ngenand no Cegu Doole xe Yakoob.»

⁶I nanta Efrata paru no arka ne no ngiɓoor ne, too i soƥaan na xa saawit axaa Yaar[52].

⁷Fat i ndet no ngenand um, ngung mbaambir o dakand ole ten.

⁸O Yaal oxe, inooxi. Gari no ñootnooxand of, wo fo arka ne na katil of.

⁹Yaasam saasadax we wo a ndokoox o cofel, soo we ndamooxna na wo a soroxole!

¹⁰Yaam o tag of Dawid ba o deɓ oxe ɗuumoona.

¹¹O Yaal oxe a daaɓooxa fa Dawid, too no ndigil, nomtooxkee teen a cinj ee: «Xam moofin o leng na xa taan of took uum-maamaad le wo.

¹²Boo xa ƥeef a ngayna ngiɓoor es fo bargal es ke um aqatinaa a den, we mbaqaqoorna na den itam xan a moof took uum-maamaad le wo boo kili.»

¹³O Yaal oxe a jila a Siyoŋ, too a buga ngenand um a ref maaga.

¹⁴Kaa tee: «Maaga o ñootnooxand es a refkaa boo kili. Xam gen teen, yaam bugaanum.

¹⁵Xam barke ñaamel um, rool we ten, um giñnoorit a den ñoowir ke da soxla’na.

¹⁶Xam rokan saasadax we ten a muc ale, soo gimu we ndefna teen a soroxole.

¹⁷Xam sutit Siyoŋ o maad o cegu katil, ta hat no kurcala le Dawid, saxin teen oxe ɗuumuuma nen o lampa heƥande.

¹⁸Xam ɓek fañ we ten gaci, soo ten o mat, o ndip no maad um xan a meleƈ took xoox um.»