Read NQAARIIT NE ROOG A kim a tedu ke 138 Bible Online

A kim a tedu ke 138 - NQAARIIT NE ROOG bible

A kim a tedu ke 138

¹A kim alaa fogna na ke Dawid oo. O Yaal oxe, kaam gidmang fo xeeñ es fop. Wo Roog, kaam tagastang a kim mbaambir katil ke na asamaan.

²Kaam gungaa no Ngenand tedu ne wo, gidmang yaam o mbeq of fo ngor of, yaam fadniro a tegit of soom, day teen, ndaa fi’aa kupu ke i cungoogna na wo sax.

³A koom alaa ƴufginooxoonga, jaaɓaxamo, soɗaam njambaar, ci o laaw es doole.

⁴O Yaal oxe, xan maad we no lanq ke fop a ngidmong, yaa da nankaa fa lay of.

⁵Xan a ngimanaa a ƭat ake no Yaal oxe, yaam o ndam onqe no Yaal oxe a magna.

⁶O Yaal oxe xaay took-ee-took, ndaa yaqanee ta ga’aa oxe xeefeena soo a andditaa koƭu oxe magnandooxna.

⁷Boo um ñaaƴaa kam naqad fee, kaa o ñoowdandaxam. Fañ es we mbuuxna, kaa o doonaa a den o ɓay, a ñamaak of a muclaxam.

⁸O Yaal oxe xan a fadnanaam ke ta geekanaxama. O Yaal oxe, wo fee o mbeq of a maadaa boo faw, ba o xuuf calel ke xa ƥay of a sumbna.