Read NQAARIIT NE ROOG A kim a tedu ke 139 Bible Online

A kim a tedu ke 139 - NQAARIIT NE ROOG bible

A kim a tedu ke 139

¹O yaal a ƭat ale no jeejeek we a xoolne yee a kim a tedu lene kaa fog na ke Dawid. O Yaal oxe, kaa o horooxaam, too andaxamo a paax.

²Um moofangaa mbaat um inoox, andaa. Andaa yuuƥ es yaaga ɗaapafuliim a den sax.

³Boo um ñaaƴaa mbaat um ñootnooxaa, andaa, too muu o jaf es a dakaa, kunpa’irang.

⁴Boo um helko fo yaƥataa, a soƥa andaa ke buguuma o lay fop.

⁵Kaa o saytooxaxam mbaambir oo, a cinj oo, o ɓay of, o doonin took es.

⁶O and of oleene kaa hupaam, a gartaam took boo waaginum o dam.

⁷Ndi mam waagum o ret boo goƭ Yiif of? Mam um ƴufkaa maa ga’itkeeraxamoona?

⁸Um ŋaayangaa na asamaan, woxey maaga, um fudoox jaaniif, um soƥong maaga.

⁹Um yetangaa boo maa njeeƈ ne a wattaa mbaat um genik maa ta mudtaa,

¹⁰maaga sax o ɓay of xan a ɗoxaam, a ñamaak of a pokaam.

¹¹Um lay’angaa sax ee: «Yaasam o niɓaan ole a muuraam, a qoolaand ale widaxama a ref o yeng»,

¹²na wo o niɓaan ole refkoogee o niɓaan, too o yeng ole a xoolitkooga nen ñaal ne, o niɓaan ole nen a qoolaand.

¹³Wo saku ngiin es, moolaam no fud ya es.

¹⁴O Yaal oxe, mexe gidmang, yaam ne saktoona cer es a wega xoox. Ke o fi’aa kaa jom’andit, andaanum a qool qac.

¹⁵Xa kiiƈ es kunpa’irang, ye o moolaxam na pet, sakaxam no fud ya es.

¹⁶A kid of kaa nga’oogaam, ye saqafuleeruuma o mem o leng. Bind’aa yaaga no safe le wo xa yeng axe hapan’axamoona fop, yaaga o leng na den ferafulee.

¹⁷Wo Roog, a ɗoma na mi lool ndax um dam yuuƥ of, too o leng andee ne da mbodeena!

¹⁸Um lim’angaa a den, den moƴkoogu o may pep ke no lanq ke. Um lim’angaa a den fop oo, taxkoogee um andong.

¹⁹Wo Roog, ngela warnoori soxodu we! Nuun waawar we, ngoƭaamoo!

²⁰No qooleer rek a laytaa paru na wo, too xa maaƥ doŋ na taxaa da ne gon of, den we fañ of.

²¹O Yaal oxe, kaam fañraa fo we siboonga, soo we siiknoorna fa wo a mbataam xus.

²²Mbañir es fa den kaa dey sik, um fi a den fañ es tigi.

²³Wo Roog, horooxaam too and xeeñ es, ɗeetlooxaam too and a qalam es.

²⁴Ɗeetangi boo ga, a soƥangaa yee na ƭat a paaxeer ale xotum, ɗoxaam na ƭat ale na refkaa boo faw.