Read NQAARIIT NE ROOG A kim a tedu ke 14 Bible Online

A kim a tedu ke 14 - NQAARIIT NE ROOG bible

A kim a tedu ke 14

¹O yaal a ƭat ale no jeejeek we a xoolne yee a kim alene kaa fog na ke Dawid. Oxe na layaa taa kam um ee: «Roog jegee.», yoqit oo. Fop kaa laawoox, a mbi’aa pariƴ ƥor, too jegee o leng oxaa na fi’aa paax.

²O Yaal oxe kaa fod took-ee-took asamaan, a horooxaa wiin we boo a ga, ndax a jega na den o cegu yiif, ndax a jega oxaa na waaƭaa a Roog.

³Fop kaa ƭap a ƭat ale soo a mbokatoor, a laawoox. Jegee oxaa na fi’aa paax, jegee o leng sax.

⁴Weene fop na mbi’aa cofaƭaru njegee o and o leng, den we na listaa xeet es ne mbuuru a listiteel too ƈufginooxkee o Yaal oxe muk.

⁵Xan a mos o send fo diid, yaam Roog kaa fartaa jofu we.

⁶Kaa nu njalaa yaakaar no ñaatu xe, ndaa o Yaal oxe refu njaɓnooxand um.

⁷Ey, bug’aam o ga wala a muc ale Isra’el na inoortiidkaa Siyoŋ? Yaa o Yaal oxe a supitkaa o roxanqol ole na xeet um, xan Yakoob a ref no ɗaay, Isra’el a felakinooxaa.