Read NQAARIIT NE ROOG A kim a tedu ke 143 Bible Online

A kim a tedu ke 143 - NQAARIIT NE ROOG bible

A kim a tedu ke 143

¹A kim a tedu laa fogna na ke Dawid oo. O Yaal oxe, nan-gilooxi a qeƭ es, rung nof of na qeƭax es. No ngor of fo no cofel of, jaaɓaam.

²Ba o layoor fa mi fee o tag of, yaam jegee o leng oxaa jofna mbaambir of.

³O pañ oxe kaa ñagadilaxam, a fooxaam a lanq, a jooraam kam o niɓaan ole nen we nqonna yaaga.

⁴Njambaar es oxe ɓutaa, xeeñ es a fag tak.

⁵Kaam wetandooxaa a pe ake yaaga, ɓaalaa taa kam es a pi ake wo fop, yiifaa ke xa ƥay of a njalna.

⁶Mexe letnaa xa ƥay es farna fa wo, o laaw es kaa hoɗomel a wo nen lanq beeru koroŋ. A maaf

⁷O Yaal oxe, ñofi jaaɓaam. O laaw es a reta. Ba o ɗasnaam mukit of, ndik um nand fo we na nqaadaa jaaniif.

⁸Wetandaam o mbeq of nqes oo nqes, yaam wo hoolooxum. Andnooraam a ƭat ale waruuma o ñaaƴ, yaam na wo um ɓakandaa xeeñ es.

⁹O Yaal oxe, wataam no fañ we mi, me wo um laqooxaa.

¹⁰Aqatinaam um fi’aa ke feloonga, yaam wo refu Roog es. Fat Yiif faaxu le wo a ɗoxaam no lanq podru.

¹¹O Yaal oxe, ñoowdandaam yaam oxe refoona, Suudi o laaw es na naqad fee, yaam kaa o jof.

¹²Xan o moocand fañ es, yaam ne fexaxamoona, saŋik noon es fop, yaam o tag of refum.