Read NQAARIIT NE ROOG A kim a tedu ke 145 Bible Online

A kim a tedu ke 145 - NQAARIIT NE ROOG bible

A kim a tedu ke 145

¹A kim a niwir alaa fogna na ke Dawid oo. Roog es, o maad es, mexe niwang, simataa gon of bo na moos boo moos.

²Kaam gidmang bes fuu refna, simataa gon of bo na moos boo moos.

³O Yaal oxe a magna too jombee o simatel. O magnel um waagaand o and.

⁴Suk nuu refna xan a kañaa a pi of, a wetandooxaa a pi katil of

⁵soo a laytaa a qoolaand of fo o niwel of fo o ndam of. Mi yoo xam yegnitaa a pi a maak ake wo.

⁶Doole fa saɗarnooxu fee wo xan a laytel, soo um wetandooxaa o magnel of.

⁷A betandax ale no paaxel o maak ole wo ñufkee, too o cofel of xan a felakinoorteel.

⁸O Yaal oxe kaa yaaj kam, a jeg yirmande, a muñantaa soo a may fo o mbeq.

⁹O Yaal oxe kaa faax no fop, a yirmaa ke ta sakna fop.

¹⁰O Yaal oxe, fop ke sakoona kaa ngidmang, too we ndamooxna na wo kaa simatang.

¹¹Kaa laytaa o ndam onqe no maat of, a lambnaa a pi katil of,

¹²ndax da andnoor wiin we a pi katil of fo o niwel ole fo a qoolaand ale no maat of.

¹³Xan o maadooxaa boo faw, too maat of xan a ref no suk boo no suk. O Yaal oxe kaa gore na tegit um, soo a jeg o mbeq na pi um fop.[55]

¹⁴O Yaal oxe kaa damaa o ɓay fop we na yenaa, soo a inaa fop we maafeena.

¹⁵A kid ake no fop kaa ngaan na wo fo yaakaar. Wo na cooxaa a den ñaamel a mbane da soxla’uuna.

¹⁶Kaa o muƥtaa o ɓay of, ci fop ke na ñoowaa ke da soxla’na.

¹⁷O Yaal oxe kaa jof na ƭat um fop, soo a jeg o mbeq na pi um fop.

¹⁸O Yaal oxe xe paam no we na ƈufginooxan fop, paam no fop we na ƈufginoortan ndigil.

¹⁹Kaa jaɓaa a qeƭ no we saɗaruuna, a nanaa a ƈufginax den soo a mucil a den.

²⁰O Yaal oxe kaa saytooxaa fop we mbexuuna, ndaa kaa saŋkaa soxodu we fop.

²¹Fat o don es a simataa o Yaal oxe, soo mbindel nuu refna a gidim gon tedu um bo na moos boo moos.