Read NQAARIIT NE ROOG A kim a tedu ke 147 Bible Online

A kim a tedu ke 147 - NQAARIIT NE ROOG bible

A kim a tedu ke 147

¹Haleluyaa! A faaxa, ndax Roog in a xaanel, pelu yoo too a mos, ndax ta simatel.

²O Yaal oxe xe maxatinaa a Yeerusaleem soo a fokataa we ndaay’ina na Isra’el.

³O Yaal oxe na wodandaa we a qeeñ den a naqadilooxna, a laxasaa kaañax den.

⁴O ten saku xa qoor axe ne da mbodeena fop, oluu refna na den, ta taaraa no gon um.

⁵O Yaal in a magna, doole um, o leng andee ne ta fodna, o and um jegee hap.

⁶O Yaal oxe kaa yoɗaa ñaatu we, ndaa soxodu we o mat, kaa maafaa a den junjang.

⁷Ngimanyo o Yaal oxe a kim a kidmir, nqilmban a Roog in.

⁸O ten na muurtaa asamaan fee a eel, a jagandanaa lanq ke a teƥ, soo a jolnaa daaƭ le took xa coong axe fo tuufe-duufe ke na njiriiñaa o kiin.[56]

⁹O ten na ci’aa muumeen ke ñaamel boo na xa woynaar axe na tooq ale na loolaa yaam nqeex.

¹⁰Doole pis refee tus mbaambir no Yaal oxe, too o qir o say yulee a ngid um.

¹¹We saɗaruuna kañ njemun, we njegna a koolax no mbeq um.

¹²Wo Yeerusaleem, ɓoxoti o Yaal oxe o ndam, kaam ee wo Siyoŋ, simati a Roog of,

¹³yaam kaa saƭkandaa a kinglir ake no begax ke wo soo a barke’aa xa ƥeef a ndeer of.

¹⁴Kaa saxnaa jam no fiisel of, a giñnoortang bele fee moƴna o faax.

¹⁵Kaa heblaa o ñuxur um took lanq ke, fa lay um a ƴuf toqet.

¹⁶Kaa pictaa nees fee nen mbuy-mbuyaan, a pasarin nen ndaw.

¹⁷Kaa deɓaa a kalam a ƥuuɓu nen fo ƭak, an waagu o xox mbaambir a ƥuuɓ ale ten?

¹⁸Kaa heblaa fa lay um, galaas fee a sooy, ta wuuɗiid nqeñ um, poofi ke a ndef no nqayataa.

¹⁹Kaa daawnaa mbind Yakoob fa lay um, bargal um fo kebil um, ta andnoor a den a Isra’el.

²⁰Fi’anee keene a xeet fa leng fa lakas, too andee a den. Haleluyaa!