Read NQAARIIT NE ROOG A kim a tedu ke 27 Bible Online

A kim a tedu ke 27 - NQAARIIT NE ROOG bible

A kim a tedu ke 27

¹A kim alaa fogna na ke Dawid oo. O Yaal oxe refu a qoolaand es fo o Muumucil es, an helum o fit? O Yaal oxe refu njaɓnooxand o ñoow es, ndi an um saɗarkaa?

²Boo fiifi paaxeer a ƥerexiidaa paam es ndax da lisit cer es, fañ es fo noon es weene o mat na tolofkaa soo a yen.

³Boo xiixire a mbogooxanaxama sax oo, o laaw es saɗarkee dara. Boo xire fee a jibna took es, yaqankiraam o jeg a koolax bo ta dey.

⁴Tig leng kut um xeɗaa o Yaal oxe, ta fidaam lool. Ten refu um gen kam Mbind ne no Yaal oxe no ñoow o ñis es fop, ndax um fuudaa o mosel no Yaal oxe soo waaƭan kam ngenand ne ten.

⁵Xan a laqaam no ngenand um, yaa taamaala a jegna, a ɗasnaam no ƭiif um, a ŋaaynaam took ɓil goƭu took.

⁶Ndiiki koy, fañ es we mbidaxama o kurul-keƥ, gartaam a den took. Xam ɓoxot nen sadax kam Ngenand ne no Yaal oxe xa ƈeel, xaanan soo simatan.

⁷O Yaal oxe, nan-gilooxi o ñuxur es, yaa um ƴufginooxang, yirmaam too jaaɓaam.

⁸Kaam yiifaa ke layoona yee: «Mbaaƭyo mukit es.» O Yaal oxe, mexe waaƭaa mukit of.

⁹Ba o ɗasnaam mukit of mbaat o raxtaam fuux of, mi fee o tag of. Wo refu ƈufig es, ba o deɓaam mbaat o waasaam, wo Roog fee o Muumucil es.

¹⁰Faap es fa ya es a mbaasangaam sax oo, o Yaal oxe xan a xotaam.

¹¹O Yaal oxe, lalaam a ƭat of, ɗoxaam na ƭat a cagu le yaam fañ we mi.

¹²Ba o xaƴ noon es da njeg ne da mbugna na mi, yaam seede maamaaɓ a inooxanaxam, a mberanaxam cegeer ƥor.

¹³A wooraxam ee xam ga o paaxel ole no Yaal oxe took lanq ke no ñoow we.

¹⁴Ɗagi yaakaar of no Yaal oxe! Refi o koor too saƭakinoox! Kaam ee ɗagi yaakaar of no Yaal oxe!