Read NQAARIIT NE ROOG A kim a tedu ke 30 Bible Online

A kim a tedu ke 30 - NQAARIIT NE ROOG bible

A kim a tedu ke 30

¹A kim a tedu laa fogna na ke Dawid oo, a jagandanel a bet ale no Mbind Roog ne.

²O Yaal oxe, mexe tagasang, yaam suudtaxamo no gamb le na saŋkax ale too xaƴiro fañ we mi da njalaam.

³O Yaal oxe Roog es, ƴufginooxaaxoong, too wodandaxamo.

⁴O Yaal oxe, inatintaxamo jaaniif, ñoowdandatinaam a ndeer no we na njimbooxaa no gamb le na saŋkax ale.

⁵Nqaanyo o Yaal oxe, nuun we ndamooxna no ten, simat gon tedu um,

⁶yaam fuux um naagee o miñaa dara, ndaa o paaxel um no ñoow o ñis fop a refaa. A yaarangaa, xa lool na ngirooxaa, ndaa a feedangaa, o ɗaay ee picit.

⁷Kaam layoogu kam o yaadax es ee: «Tolofkiim muk!»

⁸O Yaal oxe, kam o paaxel of yoɗaxamo boo um refat nen o joong o saƭku koŋ, ndaa ɗasnaxamo mukit of boo um jaqat tigi.

⁹O Yaal oxe, wo ƴufginooxum. Wo fee refna o Yaal es, xeɗoox’aaxoong ee:

¹⁰«Xar fa nqon es fo a qaat es jaaniif a njiriiñong? Ndax o pesu fo ut xan a simatong, a yegnit ngor of?

¹¹O Yaal oxe, nan-gilooxaam too yirmaam. O Yaal oxe, gari ƴufgaam.»

¹²Suptaa ñaawax es o mbec o ɗaay. Wolanaxamo ndoki ñaawoor es soo rokanaam ndoki mboƭtir.

¹³Ten taxu o laaw es a xaanang a taar o marin. O Yaal oxe Roog es, kaam simatang boo faw.